МЫЙ ШУЛІС ЛЕНИН КООПЕРАЦИЯ ЙЫЛЫСЬ?

Ленин ёрт миянлы индіс туй бур олӧмлань мунны. Сійӧ век мырсис уджалысь йӧз олӧм бурмӧдӧм понда. Миян СССР-ын унджык олысьыс крестьяна. Кызь миллион саяс керка-овмӧс. Гӧль, посни овмӧс, мукӧдыс вӧвтӧм-мӧстӧм. Кыдзи налысь олӧмсӧ бурмӧдны? — Сӧмын кооперация пыр, — шуӧ Ленин. Миян пӧ ӧні — Сӧвет власьт. Пабрик-завод государстволӧн. Овмӧс бергӧдлан воропъясыс пӧ ӧні уджалысь йӧз кипод улын. Сӧмын пӧ колӧ паськыда да збыльысь пондыны кооперация тэчны. Отсавны пӧ сылы колӧ. Кооперацияыд пӧ ӧні деревняад медыджыд вороп. Сійӧ воропас пӧ коммунист партиялы чорыда колӧ кутчысьны. Йӧзлысь олӧм кыпӧдны да гӧль йӧзӧс бур овмӧс туйӧ петкӧдны.

Мый лоӧ сійӧ кооперацияыс?

Ӧтвыв кӧ заводитӧны кутшӧмкӧ олӧм лэптан удж нуны — сійӧ и лоӧ кооперацияыд. Уна уджын деревняын позьӧ ӧтувтчыны: тӧргуйтны, видз-му уджавны, удждысьны мӧда-мӧдлы, стрӧитны завод быдсяматор вӧчны, прӧмысӧн ӧтувтчыны да мукӧдтор. Ӧтнад кӧ он вермы — унаӧн верман, дай Сӧвет власьт отсалас кооперативыдлы.

Ленин шуӧ: кымын пӧ миян уна лоӧ кооперативъяс, кымын пӧ шленъясыс збыльысь пондасны сэтысь бурлунсӧ аслыныс аддзыны, пондасны сибӧдчыны сы бердӧ — сэки пӧ и босьтас ладыс. Ми пыр зэв на гӧльӧсь да дуркӧсь. Мӧда-мӧдӧс пӧрйыштны корсям, а кооперацияад пӧ сійӧ оз туй. Колӧ збыльысь велӧдчыны на обществоса удж нуны, тӧргуйтны. Миян пӧ чайтӧны сідз: тӧргуйтӧ кӧ и, ладнӧ, кыдзкӧ да мыйкӧ. Велӧдчӧ пӧ тӧргуйтны!

Мудритӧны — ва руысь нӧк пычкӧны, либӧ быдсяма, мый оз ков, план стрӧитӧны — немтор пӧ сійӧ оз ков.

Став уджыс пӧ ӧні ас сайын — шуӧ Ленин. Ми пӧ збыльысь пондім выль бур олӧм, социализм тэчны, миян пӧ воропъясыс ӧні ас киын — сӧмын пӧ колӧ кужны уджавны. Ичӧтика пӧ да бурджыка. Кооперативъяс пыр пӧ сӧмын ми вермам деревняын овмӧс лэптыны да социализмӧ мунны.