ӦТИ АРЛЫДАЛЫКомын во шувгис нин дзор му шар весьтӧд Сэксянь, кор лыддьыны кутім выль арлыд. Тайӧ эмблема выль мирыслысь лэптіс — Чарла да мӧлӧт — миян Октябрь лун. Тэ, — коді нуан выль мир вӧсна бой, Куслытӧм песняын кувтӧм Герой. Чужин тэ сэк, кор и чужис Октябрыс, Книгаысь тӧдмалін воддза лёк олӧм, Мый вӧсна батьяслӧн вӧвлытӧм ярлун Уськӧдчис сэки оружие дорӧ. Паськыд проспектъясын гымаліс бушков, Чуксаліс тышӧ рабочӧй кварталъяс. Тэ сэк эн тӧд, мый нин час тайӧ кучкис Босьтны Бастилия пеж капиталлысь. Ленин да Сталин тэн сетісны шудлун, Мичаджык кодысь на мирын эз вӧвлы. Шуисны: велӧдчы, трудитчы, уджав, Ыджыд выль мог пӧртны олӧмӧ сӧвмы. Аддзылі ме, кыдзи тӧждысян киӧн Рӧдина лелькуйтіс-видзис бур томлун, Миянӧс ставнымӧс партия миян Велӧдіс выль сямӧн му вылын овны. Тӧдмалін тэ ыджыд олӧмлысь донсӧ: Школаысь петін и син водзад воссис Му, миян му, кодӧс помсяньыс-помӧдз Стройка став вӧръясӧн енэжӧдз посйис. Тадз, ӧтиарлыда, олӧмӧ петін! Выль пятилеткаяс шумын да гымын, Миян страна медым став ыджыд светын Ёнӧн пыр вӧлі да мичаджыкӧн. Тундралысь тэ пӧкӧрайтін просторъяс, Писькӧдін туйяс да выль каръяс лэптін. Кӧсйылін — косьтін ас туй вылысь море, Кӧсйылін — из гӧра местаысь вештін. Ставсӧ тэ бура да мичаа стрӧитін, Нэм кежлӧ здание лэптӧ кыдз зодчӧй. Мулӧн кыз пласт улысь тэ киӧн перйӧм Став паровозъясын изшомыс сотчис. Рӧдина тӧждысис тэ вӧсна мам моз, Быдтіс да радейтіс бать сямӧн Сталин. Трудитчин тэ, медым медбурӧн вӧлі Миян, сӧветскӧй мартенъясысь стальыс. Медся бур шобді мед гыаліс ыбын, Шепъясӧн сьӧкыда копрасиг-ӧвтіг. Медбур симфония гижин, и ылӧ Велӧдчин диск вына сойясӧн чӧвтны. Тэ — созидайтін да тэчин выль олӧм, Ыджыд Октябрлы Став мӧвпъястӧ сиин Сэк, кор фашист пуртӧн вундыны голя Велӧдіс мортлысь лёк выродок-писӧ. Паметяд ставыс... Войнаыслысь бушков Тэ, кызь нёль арӧса, встретитін повтӧг. Рӧдина требуйтіс врагъяскӧд тышын Воинскӧй слава да воинскӧй подвиг. Сійӧ, код быдтіс да пестуйтіс тэнӧ, Батьӧн, учительӧн кодӧс пыр шуим, — Тэ кодь жӧ руд да походнӧй шинеля Битваӧ медводдза радъясын муніс. Тӧдмалін, — миян народъяслӧн дружба Венас ас туй вылын быд испытанье... Шудаӧсь ми, — миян шуд вылӧ чужис Иосиф Виссарионович Сталин... Та йылысь думайтін лӧз Волга дорын, Тайӧс тэн висьталіс сьӧлӧмыд аслад Сэк, сьӧкыд кадӧ, кор кылін тэ, воин, Югыд победалысь матыстчан чассӧ. ...Найӧ жӧ, другъясӧн шусисны кодъяс, Долларлӧн звӧн вылӧ. кутісны ставка. Вир, кодӧс кисьтісны миян народъяс, Долларӧн кӧсйисны веситны ставсӧ... Сувтін став мир водзын, труженик-воин, Аслад победаӧн шуда да гордӧй. Сӧмын эн мстительӧн, — мездысьӧн лоин Ыджыд Европаса тэ став народлы. ...Флагъясӧн мичмӧдӧм уличӧд мунан Тэ — победитель и уджын и бойын. Комын во чужӧмсянь праздничнӧй лунлы, Кыдзи и тэныд тшӧтш, талун нин лои. Вевъялін пӧрччыны виж гимнастёрка, Мӧлӧт да чер бара киясӧ босьтны. Сідз жӧ, кыдз бой вылын, домнаяс дорын Чужӧмӧд бара нин визувтӧ пӧсьыд. Шахтаяс писькӧдан му пытшкӧ талун, Поездъяс новлӧдлан, зарни сю кӧдзан... Югыд том будущӧй миян страналысь Сталин да партия ликтісны водзысь. Мед абу кокни строительлӧн туйыс, Лэптыны пӧимысь жугӧдӧм каръяс. Став сьӧкыдлунъяс пыр партия туйӧд Чуксалӧ мунны Октябрлӧн гӧрд Знамя. Пессьӧны медым став дьявольскӧй вынъяс Коймӧд война мирын ӧзтыны думӧн, Тэнад спокойствие, выдержка тырмӧ Вына, том гӧлӧсӧн веськыда шуны: — Ышнясьны биӧн, заморскӧй бандитъяс, Сетны ог кӧсйӧй ми ӧні некодлы... Вылӧджык бдительность: Черчилльӧн кияс Кыссьӧны змейясӧн тэ дінӧ, томлун! ...Прӧйдитан тэ паськыд площадьяс весьтӧд, Менам Герой, шуда мулӧн кӧзяин. И победительлы чолӧмӧн лэптас Кремль дорсянь кисӧ любовнӧя Сталин. Ӧвтчӧй лӧз енэжын, миян гӧрд флагъяс, Славитӧй олӧмлысь мудзлытӧм томлун. Тэн, ӧтиарлыда миян Октябркӧд, Водзӧ творитны, дерзайтны да овны!
