ПАРМАСА ПРОРОК

Коми йӧзлысь ыджыд вежӧра пиӧс — Каллистрат Фалалеевич Жаковӧс вайисны Латвияысь да гуалісны Коми муӧ 1990 вося декабрь 19 лунӧ.

Коми сиктысь сійӧ петіс,
сійӧс чужтіс коми мам,
ачыс вӧр-ва сылы сетіс
мукӧдъясысь унджык сям.
Олӧм некодӧс оз жалит,
ло кӧть кага, ло кӧть пӧль,
Давпомысь Палальӧй Кальӧ
вӧлі быдӧн кодь жӧ гӧль.
Велӧдчыны муніс кӧмтӧг,
кӧть быд гӧпт нин кышліс йи,
нянь да книга ньӧбан сьӧмсӧ
пӧсьнас перйыліс бур пи.
Эз кӧ тырмыв вын да вежӧр,
дерт жӧ, гӧлӧсыс эз кыв.
Войтыр сьӧлӧмӧдз, кыдз эжӧр,
писькӧдчыліс сылӧн кыв.
Сійӧ чуксаліс выль енмӧс,
кыдз тай кевмысьӧ пророк,
медым мырддис кызьӧд нэмлысь
гӧльлун, тшыгъялӧм да шог.
Ланьтіс чужан мусянь ылын
сылӧн шӧйӧвошӧм лов...
Медся пӧсь кыв, вокъяс, сылы
шуны эз ӧмӧй нӧ ков?