ЫЛАВЛӦМ ПИ ЙЫЛЫСЬ ПРИТЧА

Ылаліс морт... Вошис пемыд-сьӧд вӧрӧ,
уна лун-вой сійӧ сэтысь эз сюр,
быттьӧ и водзас, и бокас, и бӧрас
жервидзис помасьтӧм эрдвывса нюр.
Тадз тайӧ зонмыс бур олӧмысь кежис,
гусясьны, косясьны веськӧдіс сям.
Та вылӧ шондіа томлунсӧ вежис,
лёк вылас, дерт жӧ, эз велӧдлы мам...
Ӧтчыдысь киыслы кокниа шедіс
ёртыслысь зепталӧм некымын шайт.
Тадз пыр и овлӧ ӧд: киыд кӧ пежӧсь,
шудлунсӧ некодлы сійӧ оз вай...
Ылалӧм зон водзӧ ю ньылыд кывтіс,
вунӧдіс, мый вылӧ сетӧма ки.
Юис да гажӧдчис. Медбӧрын кывсис:
кодаліг ӧдва да мамсӧ эз ви...
Коді нӧ мыжа, бур олӧмлань сылысь
ичӧтсянь некод эз веськӧд кӧ пыж?
Исковтны чой горув туйыд зэв гылыд,
парсасьны гуысь оз отсав и гыж.
Ылалӧм зон йылысь зэв сьӧкыд притча
ачым ог кокниа талун ме гиж.
Мед кодкӧ мӧд асьсӧ бурджыка видзас,
юрас да сьӧлӧмас лёклун оз видз.
Мыжалысь кияссӧ, медбӧрын, дорны
кужас жӧ дыр кежлӧ зэв зэлыд кӧв.
Притча эз помась на...
Асьнымӧс ёрны
миянлы-тіянлы оз ӧмӧй ков?