* * *

Шуӧны, эн пӧ тэрмась,
Лӧньджыка, зонмӧй, ов.
Кутны мӧй коркӧ верман
Кӧртвомӧн ассьыд лов!

Медся водз чеччысь мортлысь
Каитчӧм тэ он кыв:
Сывъялӧ сылысь ордым
Лысвалӧн югыд тыв;

Сылы жӧ лэбач сьылӧ
Лӧнь вӧрын чужӧм гимн;
Вӧтнас тшӧтш муса нылыс
Казьтылӧ муса ним.

Войвылад тувсов войыд
Кӧч бӧжысь абу кузь.
Мыйла нӧ миян сойным
Некор оз казяв мудз?

Муслунысь тадзи вермӧ
Ышмыны мортлӧн лов.
Кыдз сэсся тэ он тэрмась
Да биа ньӧв моз ов?