ШОНДІ ДА ДЗОРИДЗЬЯС

Удж вылӧ пыр ветла сійӧ уличаті, кӧні сулалӧ ыджыд ӧшиньяса важиник керка. Тані быдмисны менам челядь, а ӧні быдмӧны мукӧдъяслӧн. Важ керкаын пыр юралӧны ичӧт челядьлӧн гӧлӧсъяс да сьыланкывъяс. Садиклӧн ӧшиньясыс мусяньыс неуна и вылынджыкӧсь, уличасяньыс зэв бура тыдалӧ, кыдзи челядь сэні ворсӧны.

Но мыйла сэтшӧм ёна доймис менам сьӧлӧмӧй, кор тӧрыт бара куті восьлавны садик дінтіыс?

Ме виччысьтӧг сувті садик дорті мунігӧн, кор аддзи ӧшинь бердас топӧдчӧм кык ичӧтик нылӧс. Найӧ вӧліны ӧти арлыдаӧсь кымын, вит-ӧ-квайт арӧсаӧсь. Найӧ видзӧдісны комнатаясын ворсысь ӧттшӧтшъяяс вылас да, тыдалӧ, вунӧдісны, мый ывлаас дзирдалӧ шонді, пӧльтӧ шоныд тӧвру, вывлань лэптісны юръяснысӧ дзоридзьяс, а садик дортіыс мунӧны-локтӧны лыдтӧм йӧз. Ыджыдджык нылыслӧн чулки пӧлыс дзикӧдз лэччӧма ботинки вылас, но ачыс сійӧ эз казяв ыджыдджыкторъяс...

Ветлысь-мунысьяс эз чӧвтлыны видзӧдлассӧ челядь олӧмысь тӧдчытӧм серпас вылӧ. А ме тайӧ лунӧ сёрми удж вылӧ. Вешйи мостки вылысь бокӧ, медым сетны туйсӧ ветлысь-мунысьяслы, да дыр на сулалі мыжа морт моз.

А садикыскӧд, орччӧн башеннӧй кранъяс тэчисны кирпич да бетон выль керка стенъясӧ. Выль керкаясысь ӧтиын, шуӧны, паськӧдчас выль учреждение. Сэні кутасны сёрнитны челядьлы садикъяс лӧсьӧдӧм йылысь...

Ме вылӧ, дерт, вермасны горӧдны: аддзин муслунӧн кытшавтӧм кык дзоридз, а он аддзы сё садикъяс, кодъясӧс лӧсьӧдӧма нин челядьлы? Он-ӧ сӧр, он-ӧ няйтӧн кояв миянлысь олӧмсӧ?

Шондіӧ оз сибав няйтыд, а дзоридзьяс оз повны шондіысь. А, гашкӧ, ме медся ёна радейта и шондісӧ и дзоридзьяссӧ?