«ХВОЕПИТЬЕ» КАРТИНА ДІНЫН

Ухтаса лагерын пукавлӧм художник Миллерлӧн картинаяслы выставкасянь.

ГУЛАГ раблӧн киыс
картинасӧ сиис,
дерт, эз налы, кодъяс юӧны
пӧсь йӧв либӧ кумыс...
Сё морт пызан сайын
Бериялӧн райын
ньылалӧны пуӧм пожӧм лыс.
Быдӧнлӧн сьӧд чужӧм,
абу чужӧм, — вуджӧр, —
сӧмын ныр да син...
Бур мӧвп налы воис:
колӧ юны-сёйны
пармалысь медбур витамин.

Эз, дерт, муса Сталин
рабъястӧ тадз жалит,
дона витаминнад
эз юктав да верд.
Му пуксьӧмсянь, тӧдчӧда,
эз веськавлы ньӧтчыд
мортлысь вирсӧ юысь
татшӧм зверь.

Коркӧ важ Египетын
пирамида кыпӧдны
рабъясӧс кӧ вӧтліс
бедь да чорыд рос,
ыдждаліс кӧн Берия,
ГУЛАГ-лӧн империя
пирамидаяснад, дерт, эз ворс.

Лагерса художник
радейтана вождьлы
эз жӧ жалит краска рӧма сім.
Картиналы сетіс,
тӧдіс мед став светыс —
«Хвоепитье» ним.

Пӧрысьлунӧдз олі,
сё музейӧ волі,
ӧні тӧда,
абу татшӧмыс мӧд.
Сійӧ эз ӧд сирӧн —
рисуйтіс пӧсь вирнас,
повзьӧдлас мед нэмъяс
войтыр рӧд.