ТУНДРАСА МОРТ

Спиридон Дьячковкӧд ӧтлаын вӧлім лыжнӧй батальонын. Сылӧн сьӧлӧмӧ веськаліс пуля.

Сыктывкарсянь Усть-Усаӧдз
кӧть и зэв кузь туй,
лэбан ӧдйӧджык кык часысь
и он «гӧлӧсуйт».
— Сывъясям вай сэсся, — шуа, —
муса Спиридон,
самолётыд тэнӧ нуас,
важӧн дзормысь зон!
...Енэж виччысис нин сійӧс,
но контрольын стрӧг:
— Мый тэ сьӧрсьыд нуан, пиӧй?
Порок?.. Али дрӧб?..
Шӧйӧвошлӧ жӧ тай коркӧ
би пыр вуджӧм ёрт:
— Некор нинӧм ме эг торклы,
абу сэтшӧм морт!..
— Шуйга морӧс зептӧ восьтлы, —
мый эм тэнад сэн?..
— Эм, но сьӧлӧм бердысь босьтны
ті эн зільӧй, эн,
сійӧс, збыльысь свинеч торсӧ,
коді пыр на пӧсь,
ланьтӧдчӧма, аддзад, корсянь...
Война кадся гӧсть!..
Чуймыліс весиг хирургӧй,
вӧрзьӧдны эз лысьт...
Тісӧ весьшӧрӧ, бур другъяс,
лӧсьӧдчанныд... кысь?..
А ме ола... Кӧръяс дінын
колис менам нэм.
Нёль пилӧн да вит бур нывлӧн
дас кык челядь эм!