ПАРМАЫН ЧУЖӦНЫ ШОРЪЯС

Пармаын чужӧны шоръяс,
корсьӧны котӧртан туй,
мед сэсся ӧтувъя ворйын
гыалас зэв паськыд ю.

Тадз жӧ ӧд Эжваным миян
вӧр-валӧн гажысь оз мын,
пармаса збоялысь пиян
содтісны сылы бур вын.
Шоръяс кӧ воштасны туйсӧ,
петанін оз кӧ нин сюр,
на водзӧ видзчысьтӧг сувтас
гажтӧм да ветлывтӧм нюр.
Мыйла нӧ аслыным колӧ
кӧвъявны быд сикас пас?
Кодысь нӧ «Изьватас» полӧ,
мый корсьӧ и «Эжватас»?
Гашкӧ, и лӧнь Сыктыв вожын
олӧ нин кутшӧмкӧ йӧй,
ещӧ на «Сыктывтас» пӧжас,
ачыс кӧ юас оз вӧй?
Леткаад оз жӧ ӧд узьны,
юыс кӧть ичӧт, но ас,
вермас и Емдінын чужны
асланыс жӧ «Емватас»...

Ми ӧти керкаын олам,
радейтам быдӧнлысь кыв.
Вынсьӧдны миянлы колӧ
ӧтувъя сьыланкыв!