НОВАЯ ЗЕМЛЯ

Войвывса кӧдзыд саридз,
сэн татшӧм нима ді,
водз кодӧс дорӧ яра
гожӧмӧдз лым да йи.
Гыалӧ пыр зэв скӧра
шуштӧм-сьӧд океан.
Коръяскӧ сӧмын кӧра
вуджӧртлас ӧтнас тан.
Нэм чӧжыс, дерт, эз кежав
діланьыс сьыланкыв.
Сійӧс и ӧні вежис
атомнӧй уна взрыв.
Муыскӧд тшӧтш жӧ доймис
и океанлӧн йир,
чепӧссис сӧстӧм войвыв,
мортлӧн и кӧрлӧн вир.
Гӧлӧсӧй абу гора
восьтыны ділысь дой!
Атомӧн дурысьлысь, кора,
вӧтлыны татысь койт.
Сэтчӧдз нин сійӧн ӧвтчим,
аслыным локтӧ пом:
яндысьтӧг корам-кӧвтчам,
пӧтлун мед аддзас вом.
Прӧщатӧ эн сет, войвыв,
сетнысӧ кодлы оз ков,
и генералӧс дойдны
вит пӧвстӧн жӧ эн пов!