МОРЯК

Бать керкасӧ важӧн эз аддзыв моряк,
Ӧд матӧ нин сизимӧд во
Ёсь тӧвъясысь вернӧя видзӧ бушлат
Ас му дінӧ кӧдзавтӧм лов.

Оз любуйтчы берегӧн зонмыслӧн син,
Пыр пессьӧ тан ланьтлывтӧм шторм,
Уль ру пытшкӧ вошис рӧднӧй Сахалин,
Руд каля оз паськӧдлы борд.

Корабль водзын куйлӧ кӧ морелӧн эрд,
Но кокни пыр дженьыдик ун.
Сӧветскӧй Отчизналысь зарниа герб
Тан медся водз югдӧдӧ лун.

Оз тӧдлыв моряк кузь походъясын шог,
Дзик нинӧмысь сійӧ оз пов,
Но гудӧклӧн ичӧтсянь кывлывлӧм гор
Пыр нормӧдӧ кӧдзавтӧм лов.

И выльысь лӧнь Эжвасӧ сывъялӧ син,
Кӧн кольӧма ичӧтик грезд,
И тані встречайтӧ рӧднӧй Сахалин,
Смел пиянӧс виччысьӧ рейд.

Бать керкасӧ важӧн эз аддзыв моряк,
Ӧд матӧ нин сизимӧд во
Ёсь тӧвъясысь вернӧя видзӧ бушлат
Ас му дінӧ кӧдзавтӧм лов.