МИЯН СЫКТЫВКАР

Пуяслысь вижӧдӧм коръяс
кӧдзӧ асфальт вылӧ ар.
Сьӧлӧмным тэысь оз торъяв,
Сыктывкӧд сывъясьӧм кар!

Эм тэнад серпасад вунтӧм
войвывлӧн ас пӧлӧс мич,
пармалысь вӧвлӧм лӧнь унсӧ
вӧр-ва кӧть важӧн оз видз.

Биясӧн кытшалӧм скверын
топольлань топӧдчис ньыв,
кылӧ том войтырлӧн серам,
юргӧ Куратовлӧн кыв.

Ӧтвылысь накӧд ми сьылам,
ошкам и лысва, и зэр.
Ми весьтын паськаліс ылӧдз
енэжлӧн кодзулӧсь эрд.

Тулысын, арын и тӧлын
оз волыв радлунлы пом:
кыксё во му вылас олан,
ачыд выль каръяс кодь том!