МИЯН ПЯТИЛЕТКАЯС

Сиӧма Партиялы да Гӧрд Октябрлы

Ми вӧлім томӧсь,
ёна томӧсь,
и сиктын ыджыдаліс чӧв,
но ӧтчыд Зӧвсьӧрт катыд помӧдз
друг быттьӧ воис бушков-тӧв,
эз бушков-тӧв... А вуджис вӧлӧк
ён шыа, вына сьыланкыв:
ми кылім Партиялысь гӧлӧс
да сылысь чуксасяна кыв...
Дзик выль кыв кылім — «пятилетка»,
вит вося уджлы кыпыд план,
и сійӧ миянӧс тшӧтш лэптіс,
пӧсь нюмӧн ӧзтіс чужӧмбан.
Мед тайӧ кадсянь нэм джын колис
и чужан мулӧн вежсис эж,
ме аслам томлун вылӧ нёльӧс,
нёль томлун некодлысь ог веж.
Кӧть мӧвпным локтан лун эз ордйыв,
эг тӧдӧй, мый ваяс выль во,
лӧнь сиктысь петкӧдысь выль ордым
эз миян томлунӧн мӧй ло?
Ми зэв водз садьмӧдчывлім вӧрын,
мед бара унджык вӧчны кер,
и отсасьысьясным пыр сьӧрысь
сэк вӧлі пила да ёсь чер.
Водз тулыс найӧс вежліс багыр,
а оланінӧн лоліс пур,
эз пелькджык миянысь ло ягын
быд зверысь тэрыбджык на ур.
Пур шӧрӧ кыпӧдлім зіб йылӧ
ударнӧй уджӧн босьтӧм флаг.
И миян йылысь медводз сьыліс
выль сьыланкыв жӧ гажа яг.
Бригадаын куш сӧмын зонъяс
да Оля нима ӧти ныв.
Ми тӧрлім лыскысь ӧти чомйӧ,
кӧн эз вӧв сэрӧг, эз вӧв кывт.
Кӧть уджным вӧлі ёна сьӧкыд,
эз некод норась и эз бӧрд,
а Оля вердіс шыдӧн-рокӧн
да песіс пуръясян коз ньӧр.
Ми видзим дзоридзӧс, бур чойӧс
да тӧдім сылысь ыджыд дон,
мед коркӧ арся пемыд войӧ
эз гусяв мӧд сиктысь збой зон.

Сэк радио эз шыав вӧрад,
эг кывлӧй музыкалысь гор,
но тӧдім, мый миянлысь корӧ
Донбасс, Магнитка, Краматорск...
И миян парма вомӧн ордым
Печоралань эз ӧти вудж,
и шӧйӧвошӧм визяорда
эз весиг чеччавнысӧ куж.
Чибьюса первой бурӧвӧйӧ
ми сэк жӧ пуктыштлім тшӧтш пай.
Эз менам ӧмӧй Карко вӧлӧй
нефть перъян трубаяссӧ вай?
И вӧлі медся югыд тулыс,
кор сиктын котыртім колхоз.
Сэк, ыджыд праздник лунӧ, мулысь
став боръяс чашйис гӧрд обоз.
Зэв дзескыд вӧлі няньӧн-солӧн,
и кӧмкот-паськӧм ёна гӧль,
но некор пикӧ эгӧ волӧй,
тадз велӧдісны бать да пӧль.
...Тадз заводитчис миян томлун,
кӧть усис зэр и кынтіс юж,
эз кепысь миянӧс сэк шонты,
а шонтіс помавтӧм на удж.
Кӧть сьӧкыд удж, но кыпыд, муса,
а муса кӧ, — и мудз он кыв,
и некор сьӧлӧмысь эз чусмыв,
эз куслы Партиялӧн кыв.
И ми кӧ тэрмасим пыр водзӧ,
быд воськов вылын кольлім пас,
мӧд пятилеткалӧн выль кодзув,
и коймӧдыслӧн миян водзын
выль кодзув бара лоис ас.
И ми кӧ тувччалім пыр водзӧ,
эг кӧсйӧй воштыны бур кад,
фашистскӧй крука ныра дзодзув
пыр кисьтіс мина да снаряд,
дерт, шӧтны миян юръяс вылӧ
да бырӧдны Сӧветъяс му...
Кӧть тайӧ кадыс колис ылӧ,
но дойсӧ ӧні на пыр кылам
да дзикӧдз некор оз и ну...
Оз куслыв братскӧй гуяс дінын
бур челядь киӧн ӧзтӧм би,
но шогным некытчӧ оз инась,
оз сыв, кыдз Шонді улын йи.
Мед сійӧ, воштӧмъяс код лыддяс,
пыр кутас тӧдны олӧм дон,
кыдз война тышын киссьӧм пыдди
и муным лоис важсьыс ён.
Кыдз вӧрын быдмӧны том пуяс
да вывлань кыпӧдӧны юр,
сідз бать-мамныслӧн мича туйыс
и челядьныслы лоис бур.
Выль пятилеткаяс... Пыр вывлань...
Быд пятилетка, кыдз ён пос,
пӧсь шондіыслӧн муса сывйӧ
эз водзӧ лэптысьӧн мӧй ло?
Сё аттьӧ Партиялы, коді
нелямын во нин видзӧ мир
да дорйӧ шудсӧ быд народлысь,
мед морт эз кисьт мӧд мортлысь вир.
Ми сылы эским пыр да эскам,
кыдз вӧвлі, сідз и лоас пыр,
дас кыкӧд миян пятилетка
став миян эскӧмлунӧн тыр.
Пӧсь чолӧм тэныд, локтан лунӧй!
Ме эг жӧ шудтӧмӧн тай чуж
и некор ассьым мог ог вунӧд
да вынъяс серти бӧръя удж.
Ӧд шензьӧмысла пыксьӧ лов шы
да синъяс водзысь вешйӧ ру:
ме аддза, кыдзи кутас овны
выль нэмӧ пыриг миян му.
Дзор ветеранъяслӧн сюсь пиян
да, дерт жӧ, налӧн жӧ быд ныв
пыр вынсьӧдасны кыкнан кинас
Отчизна-мамлы сетӧм кыв.
Ми весиг мӧвпавны эг кужлӧй,
дворецын овмӧдчас мед пи,
и шондіыс тшӧтш сэтчӧ вуджас, —
сьӧд войсӧ вӧтлас лыдтӧм би.
Кыдз мынтам чужан мулы уджйӧз
и сыысь, дерт, мый ӧні эм,
и сыысь, мый на петӧ вужйысь
да быдтас томъяслӧн бур нэм?
Выль нэмӧдз локтан дас вит воӧн
быд мортлӧн лоас ӧти тӧжд:
мед вынным мӧд сы мында лоас,
мый чӧжсис сизимдас во чӧж!
Ӧд сӧмын удж и вайӧ радлун
кыдз тэрыб пӧткалы ён борд,
а коді дышӧдчӧмнас падмас,
оз ло и гӧтырыслы ёрт.
И сійӧс яндзимыс тшӧтш сёяс,
оз веськыд туйӧд коді мун.
Мед лоас медся ыджыд дойӧн
весь воштӧм весиг ӧти лун.
Пыр юргы чужан мулы слава,
мед сійӧ вына да пыр веж.
Выль паськыд туйсӧ восьтіс таво
партийнӧй кызь сизимӧд съезд.