ЛЫМЪЯ КАДЖЕРОМЫН

Парма шӧрын шы ни тӧв,
вӧр-ва лӧня узьӧ.
Лымъя эшкыннас скӧр тӧв
сійӧс эз жӧ удзӧд.
Вӧр лэдзысьлӧн сьӧкыд удж —
коскӧдз лымйын собны.
Пилиттӧгыд крепыд вуж
оз лэдз пулы пӧрны.
Кӧн нӧ пӧрӧдчысьыс?.. Ой,
эз-ӧ лямӧд пуыс?
Збыльысь, быттьӧ ловъя шой,
кыпӧдчӧ ош гуысь;
зверыс сы бӧрся... Зэв скӧр:
садьмӧдін пӧ мыйла?!!
Бур, мый ёртыс эз дыр дзӧр, —
пищаль помысь лыйліс...
Век жӧ, мынтысьнысӧ ош
ун торкысьлы кужис:
вӧрын быдтӧм ыджыд тош
нетшыштіс жӧ вужнас.
Вӧрын бара лоис чӧв.
Содтышта висьт помын:
тайӧ лоис кольӧм тӧв
лымъя Каджеромын.