КОММУНИСТ

Сэн, кӧн пессьӧ да шутьлялӧ турӧб,
Кӧдзыд морелӧн зымвидзӧ йи,
Ыджыд сьӧлӧмысь пӧсьлунсӧ нуӧ
Водзӧ восьлалысь том коммунист.

Медым мичлуныс абу тан нинӧм,
Куим тӧлысь чӧж падъялӧ вой,
Мудзӧм мортлысь оз чусмӧдлы синсӧ
Следопытъяслы тӧдтӧм спокой.

Сійӧ мунӧ пыр, мунӧ и мунӧ,
Кыдзи тшӧктӧ партийнӧй Устав,
Аслас югыд да радейтан думӧн
Кӧсйӧ быдтыны аддзывтӧм сад.

Но, а турӧбыс пессьӧ куш эрдын,
Быттьӧ шуӧ, мый ичӧтик морт
Лымйӧ йӧжгыльтчӧм Кара ю бердын
Сылысь милӧстьсӧ некор оз кор.

Мыйла милӧстьсӧ виччысьны-корны?
Коммунистъяслы ӧти закон —
Йӧзлы шудсӧ став олӧмӧн дорны
Да не требуйтны сы пыдди дон.

Море берегын муыс оз помась,
Да-й оз во сылы му вылын пом.
Мунны полюсӧдз, мунны кӧ ковмас —
Мунас повтӧг да шойччытӧг зон.

Кара ю весьтын дзирдалӧ кодзув,
Вой тӧв новлӧдлӧ вунӧдтӧм висьт,
Кыдзи турӧб пыр восьлаліс водзӧ
Ыджыд сьӧлӧма том коммунист.