ЗӦВСЬӦРТЫН БАШЛЫКОВ НИМА УЛИЧА

Кыа гыалӧ лӧнь Зӧвсьӧрт весьтын,
енэж дзирдалысь ньӧвъясӧн тыр.
Сувт да видзӧд,
пыр видзӧд, эн вешйыв,
зарни шондіыс мыччысяс пыр.
Туйыс воддзаысь шыльыд да паськыд,
сьӧд асфальт кышын быд кежанін.
Тайӧ уличлы Башлыков Васьлысь
бур йӧз сетісны кувлытӧм ним.
Сійӧ восьлаліс тат гожся лунӧ,
Чужан мунымӧс суис кор шог:
врагкӧд вермасьны сиктса зон муніс,
пӧртны олӧмӧ медсьӧкыд мог.
Бӧрсӧ гортас эз во, кӧні чужис,
сӧвмис, вынсяліс, лоис зэв збой,
кӧин Гитлерлы солавны кужис,
личнӧй врагӧн кӧ лоис герой.
Тӧдіс Волхов ю, помнитӧ Харьков,
кутшӧм вӧвлывліс Зӧвсьӧртса зон.
Сылӧн сьӧлӧмлысь бырлывтӧм ярлун
нуис рытывлань и батальон.
Эм жӧ улича лунвывса карас,
кодӧс сылӧн жӧ могмӧдіс ним.
Кылӧ, сы весьтын юралӧ бара
усьӧм пиянлы реквием-гимн:
тӧдтӧм мам тэчӧ гу вылас дзоридз,
синва войтъяссӧ йӧзысь оз дзеб.
...Асъя кыаыс лӧнь Зӧвсьӧрт дорысь
талун мыйлакӧ зэв дыр оз лэб.
Пӧся сывъяла зонмӧс и нылӧс,
паныд сюрасны туй шӧрын кор,
медым пӧльяслӧн помавтӧм сьылӧм
найӧ сьӧлӧмысь некор оз ор.