ГӦРД СУБӦТА

1919 вося апрель 12 лунӧ медводдза субӧтник вылын уджаліс В. И. Ленин, а субӧтниксӧ сійӧ нимтіс «Великӧй починӧн».

Гӧрд субӧта кыпыд,
сьыланкыв кодь гора,
фермаясӧ, ыбӧ
бур войтырӧс корӧ.

Карын, сиктын, вӧрын
бара пузяс уджыд,
шонді енэж шӧрӧ
нюмъявны тшӧтш вуджас.

Водз асывсянь зілян
тэрмасьӧмӧн локны:
вонас ӧтчыд волӧ
ленинскӧй субӧтник.

Ловъя на кӧ вӧлі,
шуднымӧс код сетіс,
миянкӧд жӧ ӧні
медводз эськӧ петіс.

Сьыланкывлӧн горыс
кывтӧ ылӧдз-ылӧдз,
гӧрд субӧта корӧ
выль вермӧмъяс вылӧ.