ВУРДРыбводлӧн овмӧсыс оз артмы вывті бур, Директорӧн кор сэтчӧ пуксяс Вурд. А таӧдз Вурд Министрӧн, зонъяс, вӧлі Да вит во ноксис Яйӧн, выйӧн, йӧлӧн. Кӧть ачыс эз нин вӧвлы вывті том, Но ӧдйӧ кисьтіс куим Маслопром. Кор аддзисны, мый Вурдысь тӧлкыс этша, Эз печиктыны сылы паськыд плешас, — Номенклатурнӧй корсисны выль пост! — Тэ — Вурд. Тэ бура тӧдан уна ты да ю, Рыбводӧ ӧні тэнӧ вештам тась... — Ме — дась! — Вурд чӧвтіс вылас шоныд пась, — Рыбводын збыльысь колӧ зумыд власть! И со, зіль Вурдным ыджыдалӧ нин Рыбводын, Оз кытшлав аслас царствотіыс подӧн, А глиссер вылын шуръялӧ кыдз ньӧв, Оз панйы сійӧс весиг бушков-тӧв, Оз браконьерӧс сійӧ кый, А ачыс юӧ чери вый... Ми тӧдам тайӧ висьтлысь курыд пом: Став чужан муын коли дас вит ком!
