ВЕЛИКӦЙ СТАЛИНЛЫ

Миян сьӧлӧмбердса
Кыпыд сьыланкыв,
Лэбзьы вӧръяс весьтӧд,
Вождьлы ну пӧсь кыв.
Коми муын чужис
Тэнад мелі гор —
Койӧ шонді югӧр
Сылӧн зарни борд.
	Тэ лэб, миян сьыланкыв,
	Лэб!

Ну рӧдимӧй батьлы
Му бердӧдз поклон,
Висьтав ыджыд аттьӧ,
Миянлысь любовь.
Сылӧн ыджыд сьӧлӧм
Тӧждысьӧмӧн тыр.
Сійӧ — миян олӧм,
Сійӧ — микӧд пыр.
	Тэ лэб, миян сьыланкыв,
	Лэб!

1

Чужан му вылын шувгис сьӧд вӧр,
Некор яръюгыд шонді эз петав.
Сэтшӧм места, кӧн войтыр эз бӧрд,
Сэтшӧм места эз вӧв тані некӧн.

Кыпыд сьылӧм эз паськӧдлы борд, —
Курыд синваысь чужисны ёльяс:
Шогӧн парсалӧм сьӧлӧма морт
Сьӧкыд гнёт улын нэмъяс чӧж ойзіс.

Шуштӧм кадӧ, кор властвуйтіс вой,
Йӧзлысь правдасӧ лёклуныс талис,
И кор кыаыс зарни эз кой —
Эжва берегын тыдовтчис Сталин.

Индіс вождьлӧн призывнӧя ки
Коми йӧзлы свободаӧ туйсӧ —
Быттьӧ ачыс рӧдимӧй Ильич
Эжва дорӧ пӧсь сьӧлӧмнас сувтіс.

2

Важ мирӧ вына гыӧн
Кучкис грознӧй Октябрь.
Революция биӧн
Югдіс степвыв и яг.

Орччӧн русскӧйкӧд сувтіс
Нуны мезд вӧсна тыш
Коми пармаса кыйсьысь,
Украинец, латыш...

Тайӧ дружбаыс стальысь
Вӧлі крепыд да ён,
И век Сталинкӧд вӧлі
Быд тышын народ.

* * *

Кыдзи сьӧд кырныш чукӧр —
Гӧгӧр усьласис враг,
Медым мырддьыны вӧля,
Вылӧ лэптӧм гӧрд стяг.

Локтіс йирмӧгкӧд тшыглун
Йӧзӧс пӧдтыны сэк,
Вӧвлӧм рабстволысь кӧвъявны
Миян сьыліӧ чеп.

Киссьӧм овмӧсын ветліс
Ӧти курыд нужда,
Но победаӧн петіс
Гӧрд Октябрлӧн салдат.

Смертнӧй тышын важ мирыс
Йӧзлысь воля эз вен.
Прахӧн кок улӧ водіс
И пеж интервент!

3

Паськыд степьяс, вӧръяс, эзысь юяс —
Ставнас миян ыджыд чужан му
Дзирдалана аскиӧ выль туйын
Нэмыс кежлӧ аддзис тувсов шуд.

Дзоридзьясӧ пасьтасисны садъяс,
Сявкнитіс пӧсь шонді зарни зэр.
И колхознӧй уджлӧн помтӧм радлун
Мичмӧдіс став мулысь паськыд эрд.

Дзикӧдз вежсис чужӧмыс страналӧн.
Шызьӧдіс став мусӧ стройка гор.
Ачыс ыджыд аслас став судьбалӧн
Лоис миян вӧльнӧй, гордӧй морт.

Севернӧй сиянье дзирдысь югыд
Сталин нимын воплотитчис мич.
Сетіс ставсӧ ыджыд бать да другным,
Мый народлы кӧсйысьліс Ильич.

4

Чужан му весьтӧ кыптіс сьӧд кымӧр,
Медым мырддьыны миянлысь шуд.
И войналӧн лёк, бешенӧй гымыс
Торкис мирнӧй народъяслысь удж.

Сьӧкыд часӧ ми кылім —
Пӧсь, взволнованнӧй кывйӧн
Миян йӧз дінӧ шыӧдчис вождь.
Сталь стенаӧн, кыдз ӧти,
Тышӧ сувтіс народ.

Бойӧ мунісны полкъяс
Дорны ыджыд Победа и Мир.
Ураганнӧй кӧн ыпъяліс би,
Кӧн Победалӧн радлуныс чужис, —
Вӧлі Сталин сэк миянкӧд быдлаын пыр.

Мудрӧй Сталинлӧн шондіа гений,
Кодысь крепыдджык абу мӧд вын,
Лёклысь бушковсӧ му вылысь веніс
И войнаыслысь ӧвтыштіс тшын.

Русскӧй воккӧд народъяслӧн дружба
Лои ещӧ на зумыд да ён,
И победнӧй салютъяслӧн юргӧм
Паськыд муыслысь кытшовтіс от.

* * *

Муса чойлысь, мамлысь курыд синва
Вунӧдны ог вермӧй некор ми.
Миян шуд и кагалӧн сӧдз синъяс
Требуйтӧны видзны югыд Мир;

Требуйтӧны мирса честнӧй войтыр, —
Му вылын выль бушков мед эз чуж,
Синвалӧн да алӧй вирлӧн войтыс
Прӧстӧй йӧзлӧн некор мед эз усь?

5

Выль вынӧн пузис ыджыд созиданье, —
Отчизналысь ён вынйӧр дорам ми.
Пыр кыптӧ вывлань миян югыд зданье —
Вождь киӧн начертайтӧм коммунизм

Великӧй гений ловзьӧдіс пустыня
И шызьӧдіс моторъяс шыӧн яг,
Том бордъяса смел йӧзлы восьтіс енэж
И кӧртвомаліс юлысь визув ва.

Сьӧд вынъяслы не кусӧдны яр шонді,
Не ӧзтыны войналысь шуштӧм би.
Великӧй Кормчий нимын куттӧг ломзьӧ
Став мувывса народъяс костын Мир!

И вождь дінӧ быд помсянь тувсов ваӧн
Стремитчӧ прӧстӧй, уджалысь народ.
Ми шудаӧсь, мый свет вылын Москва эм,
Великӧй Сталин — медся мудрӧй морт!

Сталинлы слава!
	Великӧйлы слава!
		Нэмъяс чӧж слава!