ВЕЛИКӦЙ РУССКӦЙ НАРОДЛЫ

Дзор нэмъяс пытшкын лыдтӧм колис во...
Оз помнитны сё вося пӧрысь пуяс,
Сьӧд пармаӧ кыдз пырис коми морт
Зэв важӧн коркӧ зверлӧн ветлан туйӧд.

Судьбакӧд тышын сійӧ корсис шуд,
Но тайӧ шудыс котӧртіс пыр водзӧ,
И чайтіс морт, мый некор оз нин чуж,
Оз мыччысьлы небеснӧй югыд кодзув.

Лёк войтӧв шӧйтіс, кынтіс мортлысь лов,
Шог ветліс орччӧн, правда — кӧнкӧ ылын...
И тэ дінӧ сэк юкны нянь да сов
Гӧль мортыс локтіс паськыд Эжва вылысь.

Тиранъяс улын ачыд вӧлін гӧль,
Но пӧсь душанад кылін йӧзлысь шогсьӧм.
Быд керкаын тэ лоин медбур гӧсть,
Сердечнӧй гӧсть, сердечнӧй, медбур вок тэ.

Важ олӧм казьтылам ог сійӧн ми,
Мый русскӧйлы да коми мортлы муса.
Бедалӧн часӧ, не кӧ тэнад братскӧй ки,
То нациялӧн олӧм миян кусі!

Бур дружба кывйысь — абу бурджык мич,
Ӧд сӧмын тайӧ кывйӧн сьӧлӧм бурмӧ.
Великӧй русскӧй морт — рӧднӧй Ильич
Отчизна босьтны лэптіс йӧзӧс штурмӧ.

Быд мортлы дона аслас чужан му,
Быд турун си кӧн сьӧлӧмнымлы муса,
И ӧти мам — Сӧветъяслӧн Союз,
Отчизнаӧн став кывъяс вылын шусьӧ.

Пыр ӧтвылысь ми тэкӧд, русскӧй вок,
Да мукӧд вокъяскӧд пыр орччӧн мунам.
Пӧсь клятванымлы некор пом оз во,
Кыдз помтӧм нэма ачыс миян муным.

Выль асыв сувтӧ... Кучкалӧ квайт час
Быд сьӧлӧмлы зэв дона Спасскӧй башня,
Выль подвигъяслань быттьӧ быд выль шаг
Сӧветскӧй йӧзлысь быд лун сійӧ пасйӧ.

Ми шудаӧсь, — эм мирын сэтшӧм кар,
Став туйяс кытчӧ восьсаӧсь быд мортлы,
Кӧн дона Сталин, миян вождь да бать,
Смел мӧвпнас кадлысь визувтӧмсӧ ордйис.

Душаным сэн, и сьӧлӧм сыкӧд век,
Код шудлун туйӧд нуӧдӧ пыр водзӧ.
Став му шар пасьта койӧ ассьыс свет
Рӧднӧй Москва — выль мирлӧн зарни кодзув.

Пӧсь аттьӧ тэныд ставсьыс, русскӧй вок,
Быд кыв вылын, быд сьыланкывйын слава.
Мед олас миян сталинскӧй держава —
Свободалӧн да дружбалӧн оплот.