А КОКТӦМ МОРТ НУӦДӦ ТЫШАлексей Лютоевлы, кодлы война бӧрын вӧчисны сизим операция.Палатаын сӧмын и эмыс — кык койка да нёль еджыд стен. Эн куйлывлы некор на нэмад тэ, шуда морт, тыдалӧ, сэн! — мед ен видзас, шуласны, водзӧ пыр тыр-бурӧн колльӧдны нэм, ӧд быдӧнлӧн туй индысь кодзув и бурджык, и омӧльджык эм. А тэнӧсӧ мыйла нӧ бара палатаӧ вайисны, друг, и тыртнысӧ кымынӧд арӧс тшӧтш кӧсйысьӧ тӧдны хирург. Ёсь скальпельяс куйлӧны орччӧн, сестра вайӧ шприцъяс да спирт. Тэ кевмысян, норасян, ёрччан, мед пидзӧстӧ протез оз нирт... Но кокниа вӧчӧны ӧні, он вермӧдчы восьлавны кор: дзик сы бердті, кок лыыд кӧні, пыр вундасны неыджыд тор. А тэныдсӧ терпитны кыдзи, кор лы пытшкад ыдждалӧ пурт? Кӧть му шарсӧ гугӧд да пыдзырт, но кок пӧлыд оз жӧ нин сюр. Ме кевмыся тӧдса хирурглы, ог дзеб ассьым тӧждысьӧм войт, мед фронтвывса вӧвлӧм бур друглы оз вӧч талун ыджыдджык дой. Наркозлӧн пӧ выныс зэв ыджыд, оз ор менам другӧйлӧн ун, а сійӧ, хирург, абу мыжа, мый ранаыд йирӧ эз сун. Кӧть комын во коли нин бӧрӧ, кыдз шонділӧн ясыдмис кытш, но, кажитчӧ, ловъя на вӧрӧг, а коктӧм пыр нуӧдӧ тыш.
