ГИЖӦД ТӦВАРЫШЪЯСЛЫ КОМИ ЙӦЗЛЫ

Приветствуйта мыччысьӧм гижӧд почтеннӧй тӧварышлысь Н. А. Шаховлысь “Зырянская жизнь” газетын № 6 и ещӧ ёнджыка приветствуйта явитчӧм Помӧсдін вӧлӧсьтын партиялысь, коді шусьӧ “Коми автономист чукӧр”. Сэтшӧм партияыслы колӧ воссьыны быд вӧлӧстӧ миян Сыктывдінса карулӧ и разавны Яренскӧй карувса комияслы, сідзжӧ быд вӧлӧсьтӧ кывсьыны сы йылысь мукӧд местаын олысьяс комияс костӧ. Коми автоном республика миянлы колӧ восьтыны некутшӧм пӧра нюжтытӧг, нюжӧдчам кӧ — ми унатор воштам. Роч йӧзлысь кодйысьӧм гуран миян вӧр-пу озырлунӧн ковмас тыртны и аслыным кольччыны сэтшӧмӧн, мый шусьӧ “кола ни двора” — сяр ни палич.

Ещӧ миян колӧ коми йӧзлы шыбитны оскорбительнӧй кличка “зырянин” и босьтны ассьыным ним “коми”. Ми Коммуысь, Кама вылысь петӧм йӧз век шусьылім Кама йӧзӧн (коми йӧзӧн). Кличка “зырянин” миянлы сюйӧма бокисянь, вынаджык суседъяссянь. Найӧ сідз жӧ оскорбительнӧй кличка сетӧмаӧсь яранъяслы — “самоед”, лапландса йӧзлы — “лопарь”, быдӧн татшӧм прозвищеыс мустӧм и ӧбиднӧ национальнӧй чувстволы. Сы понда колӧ сувтны став коми йӧзлы и шыбитны, чӧвтны медпервой ӧбиднӧй прӧзвище “зырянское” и вежны сійӧс ас нимӧн “коми”. Кывъясӧн “зырь”, “зыряк” ругайтӧны миянӧс роч йӧз.

Степан Перымскӧй дырйи коми йӧзлӧн “зырянин” ним эз на вӧв. Сэки коми йӧз шусьылісны “пермяне”, сы понда мый найӧ коркӧ овлӧмаӧсь парма вылын. Чердынскӧй уезд, коді ыджыд парма вылын (перма) ми ӧні на шуам Коммуӧн (коми му). Коми йӧзлы прозвище “зырянин” навяжитісны (кӧртыштісны) коми йӧзӧс дзескӧдысьяс, лунвывсянь войвылӧ зырысьяс — роч йӧз. Тайӧ нимтӧдӧм вӧлі ёна нин сёрӧн, Степан бӧрын, код дырйи абу на тӧдлӧмаӧсь сэтшӧм кыв “зырянин”.