* * *

Кодзувъяс, кодзувъяс...
	Менӧ ті кыланныд? —
кыдз ылі енэжас
	оланныд-выланныд?
Арся сьӧд войӧ
	и тувсов сӧдз асылӧ
дзорга пыр тіянлань,
	мусаяс, ясыдъяс!
Кымын сюрс нэмъяс ті, —
	мӧвпала, — войтырлысь
сьӧлӧмъяс гажӧдӧм могысь
	пыр койтанныд?..
Ӧтчыдысь тіянӧс
	мортыд эз ёрлывлы,
шудлунсӧ козьнавны
	сӧмын корлывліс...
Мыйла нӧ му вылас
	найӧ тшӧтш чужисны,
атомлысь вын
	кодъяс перйыны кужисны,
кодзувъяс чукӧрӧдз
	лэптыны кияссӧ,
асьныссӧ, войтырӧс,
	дасьӧсь тшӧтш виавны...
Мулысь и кодзувлысь
	скӧрлунсӧ чукӧртам,
быд ловъя лов дінӧ
	гораа чукӧстчам
видзны веж вынысь
	лӧз енэж да войтырӧс,
кодъяслӧн сьӧлӧмныс
	важӧн нин дой тыра...
Кодзувъяс, кодзувъяс...
	Менӧ ті кыланныд? —
мыйла сьӧд кымӧрлань
	ӧні ті пыранныд?
Дзирдалӧй, дзирдалӧй,
	ясыда, кыпыда,
войтырӧс дорйыны, енэжсӧ
	кыпӧдӧй!