ВАСЬ ДЯДЬЛӦН МЕЛЬНИЧА

Ветліс ылыс Котельничӧдз
Вась дядь, мамлӧн вок,
Тӧдны, кыдз тэчны мельнича,
Сійӧс нуліс зіль кок.
Зӧвсьӧрт эз вӧвлы озырӧн,
Жеба быдмыліс нянь,
Но а челядьтӧ моздор тыр,
Дерт жӧ, кутліс быд ань.
Колӧ быдӧнӧс вердны ӧд,
Медым олӧм оз ор,
Кывтіс миян сикт бердті кӧть
Уджтӧг Нирими шор.
Сылысь Вась дядь и доддяліс
Гажа визувлун кор,
Лун и вой быд поводдяӧ
Кыліс изкилӧн гор.
Да и став Коми му вылын
Эз вӧв шор либӧ ю,
Шысӧ изкилысь зэв ылӧ
Медым тӧлыс эз ну.
Миян томдырся олӧмным
Кӧть и вӧлі зэв гӧль,
Эз ӧд весьшӧрӧ овны жӧ
Тэа-меалӧн пӧль.
Ӧні ёна кӧть вельмим да
Ог нин вӧдитӧй нянь,
Киссис зэв важӧн мельнича,
Кодӧс тэчліс Вась дядь.
Асьсӧ нуисны лагерӧ
Изны дявӧллы пызь...
...Шогӧй сьӧлӧмӧс чабыртӧ,
Сыысь мездысян кыдз?