***

Коми АССР, Сыктывдинский р-н,

Палевицкий с/с, д. Сотчем,

Размысловой Евдокии Павловне.

26.06.42 во.

Чолӧм!

Бӧръя письмӧ ме, кажитчӧ, гижлі Солнечногорсксянь, коді Москва дорын матын, но ыстылі эг письмӧсӧ, ог помнит. Юӧрта нӧшта ӧтчыдысь, мый Архангельскысь менӧ мӧдӧдісны Москваӧ, а сэсянь — Солнечногорскӧ, кӧні велӧдчи нӧшта 20 лун. Июнь 19 лунӧ мӧдӧдісны фронт вылӧ. Находитча ӧні рытыввыв фронт вылын, Смоленскӧй областьын. Назначение эг на удит получитны, сӧмын на воим места вылӧ. Аски навернӧ сетасны рота, кодкӧд и ковмас воюйтны. Тайӧ письмӧын ассьым адрес ог на сет, абу на сійӧ. Кор кута тӧдны аслам частьлысь номерсӧ, сэки и гижа выль письмӧ, адресӧн.

Талун лунтыр шойччим ӧти деревняын, коді фронтсянь находитчӧ некымын километр сайын. Миян кӧзяйка, зэв бур старуха, лунтыр вердіс йӧлӧн да колькйӧн. Лунтыр пӧшти буглясим ӧшинь улас турун вылын, купайтчим ичӧтик юын (неуна ыджыдджык миян Дань шорысь) — туй бӧрын сюри зэв бур шойччӧг. Нинӧм вӧчиг моз, со гижи стихотворение Мишалы вылӧ. Ме кора гижны Мишаӧс, кажитчас оз сылы менам стихотворение, кодӧс гижи орудиеяс лыйсьӧм шы улын, самолётъяс жургӧм шы улын.

Татчӧс йӧзыс велалӧмаӧсь нин война дінас да уджалӧны, гӧрӧны, кӧдзӧны, кор юр весьтаныс лэбалӧны самолётъяс, неылын разрывайтчӧны снарядъяс, кодъяс тшӧкыда веськавлӧны весиг деревня шӧрӧ.

Вот и став выльторйыс, мый эм менам олӧмын.

Привет став рӧднялы.

Коля дзоньвидзаӧн.

Тіян пи и вок —

Ананий.

Содтӧд. Июль 2 лун 1942 во. Менам адрес: Действующая армия, полевая почтовая станция 1657, 335 стр. полк, 3 батальон, 8 рота, лейтенанту Размыслову А. П.

Витӧд лун нин находитча передӧвӧйын. Ола землянкаын. Дзоньвидза и здоров.

Виччыся письмӧяс.

Ананий.

МИШАЛЫ

Ыджыд чолӧм, менам дона вок,

Ылыс рытыввывсянь, ыджыд воксянь...

Таво гожӧм, гашкӧ, ог на лок,

Но эн шогсьы, ньӧти тэ эн шогсьы.

Гожся рытын чужан сиктын рам,

Рӧмпӧштан кодь Эжва юным шыльыд.

Кӧнкӧ тарыт миян муса мам

Лунвыв йӧрын уджалӧ на зіля.

Тӧда, сійӧ, узьны водіг моз,

Частӧ гажтӧмтчывлӧ миян йылысь,

Кодъяс эновтісны

шоныд чужан поз,—

Коді кытчӧ — муналісны ылӧ.

Вӧлім ӧкмысӧн ми — пи да ныв,

Но код бордъясьыштӧ, пыр жӧ лэбзьӧ...

Кӧть и, вокан, паськыд му шар выв,

Олӧм туйсьыд некытчӧ он дзебсьы.

Быдмыштан, и гӧгӧрвоан сэк,

Кутан ачыд корсьны аслыд шудлун.

Сӧмын янсӧдчигӧн пӧрысьясӧс тэ

Морӧс бердад топыдджыка кутлы.

А тэ ӧні сӧмын сьыв да ворс,

Налысь сьӧкыдлунъяс гажӧд, мичӧд,

Вугрась, котрав, ӧсьникысь мӧс корсь,

Эжва кырсянь пароходъяс видзӧд.

И мед некор оз босьт тэнӧ шог,

И оз нормыв сьӧлӧм тэнад могтӧг.

Гашкӧ, таво гожӧм ог на лок,

Но быть локта коркӧ, локта.

Ананий.

26.06.42 во.