***

Коми АССР, Сыктывдинский р-н,

Палевицкий с/с, д. Сотчем,

Размысловой Евдокии Павловне.

Видза оланныд, мам, Шура, Зина, Миша, Альбина!

Выль местасянь ме тіянлы нинӧм на эг гижлы и адрес эг юӧртлы. Но ме сеті телеграмма батьлы Часӧ адресӧн и, ме думайта, мый сійӧ тіян эм.

Ме ола ӧні Солнечногорск карын, коді Москвасянь квайтымын километр сайын. Велӧдча Высшӧй стрелково-тактическӧй курсъяс вылын («Выстрел»). Тӧлысь кык, буракӧ, бара на ковмас велӧдчыны, август тӧлысьӧдз кымын, самӧй бур пӧрасӧ. Но думайта, мый пӧраыс тані коляс ӧдйӧджык Архангельск дорысь: тані и местаыс бурджык и гажаджык, и шоныдджык, и бурджыка велӧдӧны.

Москваын олі кык сутки. Дырджыксӧ эз видзны, мӧдӧдісны со татчӧ. Гуляйтны кӧть и эз удайтчы, но ветлӧдлыны ёна сюрис. Вежсьӧма ёна. Рынокъяс вылын вузасьӧны ёна. Кӧть быдтор дона, но ёна донтӧмджык Архангельск дорысь.

Ас йылысь ставыс.

Гижӧй мен частӧджык: быд вежонын ӧтик письмӧ. Юӧртӧй, кыдзи оланныд, кыдзи колхозын олӧны да уджалӧны. Кӧні Шура? Кыйӧ-ӧ чери?

Менам адрес: г. Солнечногорск Московской области, п/я 2243, литер «5», меным.

Вот и ставыс.

Кора висьтавны поклон Агни чойлы, сваттялы, бабӧлы, чожӧлы да мукӧд рӧднялы.

Архангельскын на меным присвоитісны военнӧй звание — лейтенант.

Коля ловъя и здоров, тіян пи, вок и тӧдса.

Ананий.

Солнечногорск кар, 11 июня 1942 во.