***

Коми АССР, Сыктывдинский р-н, с. Часово, Леспродторг,

П. М. Размыслову.

Чолӧм, батьӧ!

Гижа Солнечногорск карсянь, коді Москвасянь 60 километр сайын, Октябрьскӧй кӧрт туй кузя. Архангельскысь ми петім май 25 лунӧ, а кык сутки мысти воим Москваӧ. Москваын олім кык сутки. Сы бӧрын мӧдӧдісны со татчӧ. Ми ставным асьным шензям, но бара на веськалі велӧдчыны, и бара жӧ «Выстрел» курсъяс вылӧ (центральные краснознамённые курсы «Выстрел»). Но делӧсӧ колӧ гӧгӧрвоны сідзи, мый ми ӧні лыддьысям кыдз резервынӧсь, но медым пӧраыс прӧста эз вош, а вермим сійӧс коллявны кутшӧмкӧ пӧльзаӧн, вот и ыстісны велӧдчыны. «Выстрел» курсъяслӧн Кардорса филиалын кӧ ми велӧдчим стрелковӧй ротаса командиръяс вылӧ уклонӧн, то ӧні миянӧс велӧдӧны снайперскӧй командаясса командиръяс вылӧ — изучайтам снайперскӧй делӧ. Но миянӧс предупредитісны, мый ми велӧдчам сэтчӧдз, кытчӧдз ог ковмӧ, и любӧй здукӧ миянӧс вермасны отзовитны.

Архангельск дорысь тані ёна бурджык быд боксянь. Ӧти-кӧ, шоныд и местаыс гажа; мӧд-кӧ, учебно-материальнӧй базаыс ёна озырджык, весиг сравнитны оз позь; коймӧд-кӧ, преподавательскӧй состав квалифицированнӧйджык. Вердӧны неуна-неуна бурджыка. Тані полнӧй гожӧм нин. Архангельскысь петім, да турун на вӧлі абу петӧма ньӧти, муртса лым удитіс сывны, а тані нин ставыс цветитӧ, и пуяс коръясьӧмаӧсь полнӧя. Купайтчам нин матысса ыджыд тыын.

Тайӧ карӧдзыс воліс немеч. Но пышйигас абу удитӧма ёна тшыкӧдны карсӧ, кадыс абу сюрӧма. Ассьыс уна быдсяма машина кольӧма, кодъяс и ӧні на туплясьӧны быдлаын.

Вот и ставыс ас йылысь, мый эм выльыс. Менам адрес лоас татшӧм: г. Солнечногорск Московской области, п/я 2243, литер 5, меным. Адрессӧ менсьым кора юӧртны сідзжӧ и гортӧ, а верман кӧ, и Машаяслы (Кожваын на кӧ), либӧ Линалы.

Чолӧм ставлы.

Коля дзоньвидзаӧн.

Тіян Ананий.

г. Солнечногорск, 31 мая, 1942 г.