***

Коми АССР, Сыктывкар, ул. Ленина, 40, кв. 10. Щербакову Фёдору Васильевичу.

Чолӧм, ёрт! Чолӧм, ылысса друг Эдуард!

Зэв жаль, судьба кӧ вӧчас сідз, мый миян квайт-сизим тӧлысь сайса янсӧдчӧм лоас медбӧръя и нэм кежлӧ янсӧдчӧмӧн! Мен кажитчӧ, мый ми прӧщайтчим эг сідз, кыдз колӧ. Мен кажитчӧ, мый сійӧ здуксӧ кыдзкӧ, аслыным гӧгӧрвотӧг, ичӧтмӧдім, сылысь тӧдчанлунсӧ гӧгӧрвотӧм кузя. Кытчӧдз тэ вӧлін мекӧд орччӧн (ме сійӧс колльӧді Айкиноӧдз.— Ф. Щ.), весиг медбӧръя минутӧдзыс ме кыдзкӧ эг слӧймыв думыштлыны янсӧдчӧм йылысь. (Весиг пробка думыштлӧм йылысь мӧвп юр вемӧ эз волы). И сӧмын кор саялі Айкино пристань, ме прамӧйджыка видзӧдлі збыльлуныслы веськыда синмас, и пыр пукалі пароход палуба вылын, тӧв водзын, и лов вылын вӧлі тыртӧм, шог и ас вылӧ дӧзмӧм.

Удайтчылас-ӧ бӧр волыны Коми муӧ, асланым чужан муӧ, катны пароходӧн коми юӧд, аддзывны коми парма вӧрӧс, рыт колльыны коми ныв-зонкӧд? Удайтчас-ӧ коркӧ лыддьывны ёртъяс пытшкын ассьым медбур кывбур, код йылысь кута на сьӧлӧмын надея? Колӧ пуктыны став вын, мед тайӧ удайтчис. Колӧ вӧчны ставсӧ, медым не воштыны ёрта-ёртнымӧс тайӧ став мувывса бушковас.

Зэв жаль, мый ми ӧнӧдз на омӧля интересуйтчим ёрта-ёртӧн, эгӧ зільӧй кутны ӧта-мӧд костын кӧть кутшӧмкӧ йитӧд. Со коймӧд тӧлысь нин ме эг пӧлучитлы тэсянь некутшӧм юӧр. Ловъя-ӧ? Гортын-ӧ? Мый выльыс тэнад олӧм-вылӧмын?

Со сизимӧд тӧлысь нин кыссьӧ война. Сы мында кад жӧ нин ме служита армияын. Тайӧ кад чӧжнас унатор нин быдсямаыс муніс ме вывті. Но, мӧдарӧ кӧ, зэв на этша. Медся сьӧкыдыс и медся унаыс водзын на.

Неважӧн мен удайтчис случайнӧ мӧд пӧв лыддьыны А. Барбюслысь «Огонь» книгасӧ. Тайӧ збыльысь шемӧсмӧдана книга первойя империалистическӧй война кадысь. Тайӧ книгасӧ лыддьысь вермас война вылӧ ветлытӧг тӧдмавны фронтовиклысь збыль переживаниеяссӧ, фронтлысь, кыдз шуасны, неприкрашеннӧй чужӧмсӧ. Зэв сьӧкыд книга. Но колӧ пасйыны, мый ӧнія война 30 пӧв страшнӧйджык сы серти, мый вӧлі воддза империал. война дырйи. Ме надейтча, мый лоас выль Барбюс, коді сы моз жӧ протокольнӧя петкӧдлас тайӧ войнасӧ, сылӧн став пытшкӧслуннас. Тайӧ лоас страшнӧй книга и дажӧ унджык.

Ставсӧ тайӧс испытайтны асланым гӧрб вылын ми и лӧсьӧдчам ӧні. Кыдз тэныд, гашкӧ, тӧдса нин, ме декабрь тӧлысьӧдз пыр служиті обороннӧй укреплениеяс стрӧитӧм кузя (тӧлын). Декабрь тӧлыссянь миян батальон кутіс усиленнӧя велӧдчыны фронтӧвӧй условиеясын действуйтӧм вылӧ. Лун дас сайын миян батальон (отдельнӧй сапёрнӧй), кӧні ме служиті мат.-техн. обеспеч. кузя комбатлы отсасьысьӧн, муніс передӧвӧй линия вылӧ. Фронт вылӧ мунтӧдз кык лунӧн водз менӧ отзовитісны бригадаса штабӧ и сетісны выль назначение (ми кодь жӧ) батальонӧ, коді сӧмын на заводитіс велӧдчыны. Воддза частьын кӧ ме служиті хозяйство линия кузя, ӧні нуа непосредственнӧй строевӧй служба, ротаса командирлы техн. юкӧд кузя заместитель пост вылын. Велӧдам сапёръясӧс, кыдзи вӧдитчыны минаяскӧд, кыдзи взрывайтны сійӧ либӧ мӧд объект, а сідзжӧ — кыдзи стрӧитны. Служба опаснӧй, но, позьӧ шуны, героическӧй. Фронтӧвӧй условиеясын, кытчӧ думайтам веськавны вежон кык мысти, а гашкӧ, и регыдджык, кутам овны и узьлыны взрывч. веществояс вылын, минаяс вылын.

Олам ӧні волостьын, сиктса условиеясын. Занимайтчам 10 час быд лун. Сёям-юам пӧттӧдз, кӧть и огӧ вывті чӧскыда. Нянь пыдди сукар. Няньсӧ пӧжавны нинӧмысь, пызьыс абу матігӧгӧрын некӧн. Делӧыс сыын, мый Ленинградӧ туй воссьӧмкӧд йитӧдын пызьлысь и мукӧд продукталысь кызвын запассӧ тась нуисны Ленинградӧ, а матысса мельничаяс оз справляйтчыны изӧмкӧд.

Ф. В., мый выльясыс Сыктывкарын, Коми АССР-ын? Кӧні гӧтырыд^Александра Васильевна Кызродева, кодӧс вӧлі босьтӧма армияӧ жӧ, а ме сэк эг вӧв гортын. (Ф. Щ.)/^ служитӧ? Кӧнӧсь мукӧд ёртъяс? Кыдзи оланныд Сыктывкарын? Аддзывлан-ӧ М. И.-ӧс, Вас. Степ. Осипов семьяӧс, кыдзи найӧ олӧны?

Менам адрес: г. Череповец, п/я 58, команда 1243, меным.

Сиа ставсӧ, мый тэныд колӧ.

Тэнад ёрт А. Р.

19.І.1942 во.