***

Сыктывкар, ул. Ленина, 40, кв. 10. Щербакову Ф. В.

Олан-вылан, Эдуард!

Гижа Беберасянь, сы вӧсна, мый гортын эг эшты гижны письмӧсӧ. Ӧні находитча кузь командировкаын — Летскӧй, Мурашинскӧй районъясын, да талун сӧмын притча сюрис тайӧтор вылас.

Тэнӧ, другӧ, чорыда, буракӧ, гогныштӧмаӧсь, кор тэнад вермис артмыны сэтшӧм настроение. Ме думайта сідз, мый тэд эз нин вӧв сэтшӧм ыджыд коланлун пырны комсомолӧ, тӧд вылӧ кӧть ассьыд арлыдтӧ босьтӧмӧн. Ме ногысь эськӧ, партия шленӧ кандидатӧ пыригӧн тэ вылӧ справедливӧяджык видзӧдлісны, и сэк эськӧ, гашкӧ, эз ковмы вежны аслад поэзиялысь направлениесӧ. Если кӧ тэнӧ ӧні дӧзмӧдісны йӧз, кодъяс оз сулавны вылынджык мӧс сіт чукӧрысь, нинӧм на вылӧ скӧрмыны ыджыд масштабӧн. Прӧстӧ на дінті мунігӧн колӧ видзӧдны вылӧджык, в крайнем случае, позьӧ гусьӧн сьӧлыштны пинь пырыд. А направитны поэзиялысь революционнӧй струя мӧс сіт ув гагъяслы паныд, ме думайта, дзик лишнӧйӧн. Если кӧ сэтшӧм струяыс ковмас, ме дась аслам небыд лирикаысь вуджны чорыдджык жаргон вылӧ. Но пока ӧнӧдз сы вылӧ помкасӧ тырвыйӧ ог на аддзы. Институтысь петӧм ли ылыстчӧм йылысь, ме ногӧн, сідз жӧ оз ков серьёзнӧя думайтны. Ӧд сэні оз тэнӧ велӧдны, а тэ ачыд велӧдчан. Ме чайта, мый тэ сэні абу кутшӧмкӧ отщепенец. Тэнад эмӧсь тӧварышъяс, ёртъяс — чувствуйтан кутшӧмкӧ да чувство коллективнӧй дружбалысь. Тайӧ чувствоыс кӧ эм, став велӧдчӧмдырся невзгодаясыс вешйӧны бӧръя план вылӧ, сійӧ кадсӧ нэм чӧж кежлас запоминайтӧ, кыдз медбур да медмича вояс, кутшӧм эськӧ найӧ сьӧкыдӧсь эз вӧвны. Медспаяннӧй коллектив овлывлӧ сӧмын учебнӧй заведениеясын. Олӧмын жӧ, производство вылын, тайӧторйыс унджыкысьсӧ отсутствуйтӧ. А тайӧторйыс морттӧ ёна расслабляйтӧ.

Ас йылысь гижны нинӧм, если кӧ не казьтыштны сы йылысь, мый тайӧ лунъясӧ Доруправлениеса начальник приказӧн меным объявитӧма благодарность да сетӧма тӧлысся удждон мында премия. Тайӧ, буракӧ, менам рапорт (петӧм йылысь) вылӧ «резолюция» пыдди. Ӧні менӧ позьӧ шуны поэтӧн, кодӧс премируйтӧны бур туйӧн обеспечитӧмысь. Дырджык кӧ петӧм оз удайтчы, дерт, навернӧ заслужита «Почётнӧй дорожниклысь » орден!

По секрету висьтала, мый Москваӧ мунігӧн В. Юхнин да Иван Вась узисны ме ордын. Перво ошкисны менсьым «поэзия», а сэсся вӧлі тшӧктӧны ошкыны менӧ налысь творчествосӧ. Ме ӧткажитчи сетны кутшӧмкӧ-либӧ характеристика налы сы вӧсна, мый сійӧс ковмас вӧчны эськӧ нин «по обязанности, услуга за услугу», кыдз шуасны.

Сэсся пемыд вӧсна гижны нинӧм ог аддзы.

Чолӧмӧн.

А. Р.

Бебера, Летскӧй р-н.

15.ІV.1939 во.