***
Сыктывкар, ул. Ленина, 40, кв. 10. Щербакову Ф. В.
Чолӧм, Эдуард!
Аттьӧ тэнад услугаяс вылӧ.
Войдӧрлун пӧлучиті кык письмӧ. Ӧтисӧ тэнсьыд, а мӧдсӧ В. Юхнинлысь. Юхнинлысь письмӧсӧ ме гӧгӧрвои, кыдз чорыд окрик ме вылӧ, но ме эг повзьы, дерт. Талун бара гижи «нота» Союз писателейӧ. Содержаниенас верман тӧдмасьны сэн, ме чайта, сэні оз кутны сійӧс дзебны йӧз син водзысь. Эн дивит, мый унасӧ эг вермы гижны. Зэв ёна проклятӧйыд висьӧ юр. Тӧрыт ӧтилаӧ гӧститны корлісны, да талун лунтыр неморт. Немтор ог соображайт, медся нин ӧні рытнас.
Доруправление системаысь навернӧ пета 1 июльсянь. Талун предупредитчи об увольнении, оз кӧ таво вылӧ сетны гарантия институтӧ мӧдӧдӧм вылӧ. Кӧть и сетасны сэтшӧм гарантиясӧ, дорожнӧй институтӧ, дерт, колӧ гӧгӧрвоны, ог мун, лучше ваӧ пыра, либӧ медася кытчӧкӧ счетоводӧ!
Извинит, Эдуард, ньӧти ог вермы гижны. «Эм минутаяс, кор ковмывлӧ став ассьыд кывъястӧ корсьны словарысь»,— неважӧн лыдди ӧтик заграничнӧй писательлысь. Буретш ӧні менам сэтшӧм момент.
«ВКП(б) историяыд» менам эм, гӧрд переплёта. Кодлыкӧ пӧдарит либӧ вузав.
Личнӧй олӧмын пока некутшӧм вежсьӧмъяс эз на вӧвны, не кӧ сійӧс казьтыштны, мый тӧвся шынель вежи арся паськӧм вылӧ. Сэсся тулыс воӧмкӧд тшӧтш частӧджык мича нывъяс вылӧ видзӧдсьывлывлӧ.
Ӧнӧдз олӧмыс мунӧ сэтшӧм колеяті, мый творческӧй удж вылӧ ог вермы кыйны кадсӧ.
Со и тулыс локтӧ,
Куйӧдассьӧ туй.
Валегиа кокӧн
Петны оз нин туй.
Тайӧ бӧръя лунъясӧ гижӧм шедевр! «Мысльыс» сюрис кок улысь, сёйны мунігӧн.
Зэв ёна сочувствуйта, мый тэнад скӧр гӧтыр. Менам и сэтшӧмыс абу. Сідзкӧ, тэнад положениеыс бурджык. Зэв бур, мый тэ заводитін изучайтны коми письменностьлысь история. Пожелайта, заводитін кӧ, не сувтны запятая вылӧ, а ӧкӧверт воны точкаӧдзыс. Ме ог сомневайтчы сыын, ӧд тэнад натураӧн позьӧ гӧра гугӧдны.
Костюм-пальтояс ньӧбасьны менам талант оз тырмы. Унаысь кодь нин вайлісны костюмъяс, но мен век оз дӧнзьы. Вузавлӧны паевӧй книжкаяс кузя. А ме абу пайщик. Тӧрыт ассьым медбӧръя киссьӧм пинджаклысь соссӧ, дӧрӧм соскӧд ӧтиӧ сайын, орӧдӧмаӧсь. Нелепӧй пальтояс эмӧсь, серӧй, драпӧвӧй, вожа бӧра; фасоныс абу вывті ошкана. Эмӧсь мехӧвӧй пальтояс — доныс мыйкӧ 1 тысяча сайӧ. Если колӧ босьтны — приметаяссӧ сообщитӧ.
Ми тэкӧд напраснӧ ог пӧльзуйтчылӧ телефонӧн. Юӧрт телефон номертӧ, да ме коркӧ звӧнитла.
Талун кежлӧ точка. Ёрта чолӧмӧн А. Р.
с. Объячево,
30.ІІІ.1939 во.
