***

Сыктывкар, пединститут, литфакультет, ....... курс. Щербакову Ф. В.

Видза олан, Эдуард!

Ме тэн кӧсъя сетны ӧти поручение. Ме предложитлі радиокомитетӧ ассьым переводъяс: А. Пушкинлысь «Братья-разбойники» и «Домик в Коломне». Кӧсйӧны мынтыны 4—4.50-ӧн строкаысь. Регыд ме навернӧ найӧс ыста сэтчӧ, и тэ проследит, кутшӧмджык налӧн лоӧ судьбаыс. Сэсся мӧдтор. Неважӧн Союз писательяссянь корисны менсьым автобиография. Мыйла сійӧс корисны, ог вермы тӧдны. Сы кындзи, ме тӧдмалі, мый сійӧ жӧ Союз писательяссянь босьтӧмаӧсь Доруправлениеысь зэв нескромнӧй сведениеяс личнӧй олӧмысь, сэтшӧм характера, мый кымынысь гӧтрасьӧма, юксьылӧма, кымын алимент да с.в. Тэ, зон, кыдзкӧ нелегальнӧя да неофициальнӧя тӧдмӧд, кутшӧм «подвох» кӧсйӧны вӧчны, да эн дышӧдчы юӧртны.

Ӧні разрабатывайта тема аслам выль поэма вылӧ. Кӧсъя гижны Комиын гражданскӧй войнаысь неыджыд эпизод, коді развёртывайтчӧ и помасьӧ ӧти неыджыд сиктын. В основном кӧсъя поэмасӧ гижны фактическӧй материал вылын. Став задержкаыс кад сайын. Кад абутӧм вӧсна луннас сӧмын ӧтчыдысь сёйлывла. Тайӧ дзик збыль! Весиг ог эшты перепишитны ассьым переводъяс. А Пушкинлысь, кодӧс эськӧ колӧ ыстывны радиокомитетас, гашкӧ, кутшӧмкӧ и тӧлк артмас.

Гриш Сашлӧн курччалӧминъяс бурдісны, весиг омӧля нин тӧдчӧны.

Доручастокысь некыдзи оз вӧтлыны, моръясыд. Сійӧ случай бӧрын нин кыкысь вит минутӧн опоздайтла удж вылӧ, но некутшӧм мера оз принимайтны. Мый вӧсна тадзи вӧчӧны, ог вермы гӧгӧрвоны. Буракӧ, и водзӧ вылӧ поэтлы ковмас туй вӧчны да отчитывайтчыны омӧль туйяс вӧсна. Неважӧн вӧлі Летскӧй райисполкомын, кӧн президиум вылын менӧ чорыда нӧшалісны, а мый вӧсна, асьныс бура оз тӧдны дай ме ог вермы некутшӧм причина ыджыдӧс корсьны. Буракӧ, велалӧмаӧсь нин дорожникъястӧ видны на веки веков и некыдз оз вермыны отвыкнитны. Татшӧм условиеын, дерт, жизнерадостнӧй поэмаяс гижны зэв сьӧкыд. Век окота кутшӧмкӧ злословнӧй тирадаӧн выступитны дорожникъяс судьба кузя, гижны трагедия сӧветскӧй олӧмысь. Но сы вӧсна, мый миян грешнӧй уджыс став кадсӧ сёйӧ — став кӧсйӧмыс, бурыс и лёкыс, кольӧ вӧчтӧг. Вот мыйысь зэв ыджыд забеда босьтлывлӧ мукӧд дырйи. Сэтшӧм кадас весиг окота лолывлӧ и курччасьны Гриш Саш моз. Ӧні нӧшта нин ог эшты немтор вӧчны, сы вӧсна мый занимайтча пропагандаӧн 18 партсъезд материалъясӧн уджалысьясӧс тӧдмӧдӧм кузя.

Менам барометр век на петкӧдлӧ лёк поводдя. И водзӧ вылӧ некутшӧма оз тыдав ни оз тӧдчы, мый атмосфернӧй давление регыд кутас кыптыны и анероидлӧн стрелка заводитас вешйыны бурлань, яснӧлань. Сы вӧсна и сьӧлӧмлы кажитчӧ мукӧд дырйи зэв сьӧкыд и тшыгӧм, мый внешней да внутренней давлениеясыс оз соответствуйтны мӧда-мӧдыслы, мӧд ногӧн кӧ, пытшкӧсса творческӧй желаниеяслы абу позянлуныс применитны асьсӧ колана туйӧд да колана ногӧн. Сьӧлӧмын — героическӧй трагедия творческӧй наплыв, а тайӧ наплывсӧ фактически применяйта казеннӧй кывъяс да лыдпасъяс вылӧ.

Чолӧмӧн

Ананий Размыслов.

19.ІІІ.1939 во, с. Объячево.