ПОБЕДА ЛУНӦ

Пӧльяслы да пӧчьяслы, кодъяс олісны-мырсисны да и ӧні оз шойччӧдлыны кияссӧ.
Найӧ ставсӧ вӧчисны, мый вермисны, вӧчисны унджык сы серти, мый мортлы вынъяс сертиыс, некутшӧм сьӧкыдлун да шог эз вермыны кусыньтны найӧс, пыр кужисны нюмъявны да шмонитны.
Пӧсь аттьӧ тіянлы, муса пӧльяс да пӧчьяс!

Праздник луныд абу уна,
кодӧс пасйыны оз вун.
Кыдз нӧ стопкатӧ не юны,
воас кор Победа лун?
Пӧльыс тшӧтшӧдыштіс тошсӧ,
быттьӧ век на том да яр,
медым сійӧс пӧчыс ошкас,
кӧть и абу генерал.
— Генералнад эськӧ лои,
эз кӧ сконъяв пеж снаряд:
куим рана кокын-сойын,
плеш тыр чукыр содтіс кад.
Пӧчыс шмонитнытӧ кужӧ,
шуас да, он вунӧд во:
— Пӧсь утюглы сетлы уджсӧ, —
весиг чукыр джын оз ло!..
Муса пӧчыскӧд оз вензьы
би пыр, ва пыр мунӧм морт:
— Юртӧ окала ме тэнсьыд,
коді менам юрысь дзор!