МЕНАМ МУЗА

Менам Муза абу вуза...
			(И. Куратов).

Талун уджалі ме дыр,
гортӧ локті сёрӧн.
Гӧтыр менсьым ыджыд ныр
неуна эз орӧд.
— Ӧнӧдз, — шуӧ, — ме эг узь,
эг куньлы и синмӧс...
Кыдз шуӧны, пӧрысь сюзь,
кодкӧд шляйтчин, нимнас?..
Некодлысь эг сирав юр,
некодӧс эг вузав,
мися, быд бабаысь бур
менам дона Муза.
Ёна ладмам сыкӧд ми,
ӧта-мӧдӧс кылам,
а кор радейтан, сэк йи
шонді сайысь сылӧ...
Торйӧдчыны воас кад,
но, а ме ог тэрмась,
сывъявны на ӧтчыд рад,
шливгӧмӧн кӧть зэрмас.
Муслуныд пӧ, кыдз тай жель,
пырӧ сьӧлӧм пытшкад.
Мыйла ӧні менсьым пель
асланьыд тадз кыскан?
Пельӧй эз кӧть дзикӧдз ор,
век жӧ, пыр на лудӧ…

Юксьӧм йылысь гижӧдтор
гӧтыр нуис судӧ.