ПУ ЛЭБАЧВажӧн Эжва кывтыдса быд керка матич сёрйын ӧшаліс пу лэбач — челядьлӧн шуд да радлун.Ичӧтдырся казьтылӧмӧй менам шензьӧданторъясӧн зэв гӧль... Ӧтнас кужліс гӧрддзасьыштӧм нэмӧс лелькуйтыштны бур сьӧлӧма пӧль. Уджалісны бать-мам помся вӧрын, паськӧдісны видзьяс либӧ му. Горт олысьыс кӧть и вӧлі пӧрысь, ассьыс могсӧ эз весьшӧрӧ ну, — дӧмліс кӧмкот, вӧчис мича туис, сійӧн вайліс ягысь чӧскыд ли... Быдтор вӧчны сюмӧдысь да пуысь кужліс менам муса пӧльлӧн ки! Ӧтчыд, — тайӧ лои кӧдзыд тӧлын, — прӧща кора, висьтӧй кӧ нин важ, — матич сёрйӧ ӧшйӧм чача-сьӧла пыртіс миян керкааным гаж. Вӧліны сэк ёна сьӧкыд вояс, чужан муным пемыд да и тшыг. Бать-мамнымкӧд ӧтвылысь пыр сёйим петшӧрысь да шомкорысь дуб шыд. Истӧг тув эз сюр кӧ пач выв горсйысь, эз на волы олӧмнымлы пом, — водзӧсавліс пӧльӧ, вайліс ворйын мукӧдъяслӧн пачысь ӧгыр-шом. Ловзьыліс пу лэбачным пӧсь руысь, паръяліс, кор пӧльтіс ыркыд тӧв, быттьӧ сёрмӧм бордаяскӧд туйӧ босьтчис лэбны, но эз лэдз ён кӧв. Меным лэбны некытчӧ жӧ вӧлі, вывті нэр на челядьыдлӧн борд... Та вӧсна и пуысь вӧчӧм сьӧла лои меным медся муса ёрт. Олӧм дженьыд, но тай уна вичмис — сьӧкыдлун, войналӧн ыджыд би, сьӧд кырныш эз ӧтчыд мулань личкыв, морӧс пиысь лолӧс нетшышт-ви. Кызьӧд нэмыд татшӧм сійӧ лои: чардӧн-гымӧн, войтыр лёкӧн скӧр, кӧть и дойдӧ дзик быдӧнӧс дойыд, быдӧнлӧн жӧ вирыд пӧсь да гӧрд... Вежӧрнас пӧ, шуӧны, морт вына, сідзкӧ, енэж вӧлі медым сэзь, кырнышъяслы пежӧсьтны бур сынӧд сійӧ некор му весьтысь оз лэдз! Быдмӧй, муса челядь, ыджыд шудӧн тіянысь мед быдӧн лоас пӧт. Менам мойдысь пу лэбачлӧн вуджӧр тіянлысь оз повзьӧд мича вӧт.
