МУВЫВСА ВОЙТЫРЛӦН ӦТУВЪЯ САД

Лунвывса паркъясын быдмӧны пуяс,
нимъяссӧ кодъяслысь бура ог тӧд.
Веж кипарис дінын сулалӧ туя,
быттьӧкӧ ӧтиыс мӧдыслы рӧд.

Пашкыр магнолия нюжӧдчис вывлань,
ас нэмас коді эз аддзывлы лым.
Енэжлӧн пыдӧстӧм кельыдлӧз сывъяс
на весьтын меліа мурӧстлас гым.

Дзоридзӧн кышсьӧма ачыс тшӧтш муыс,
шондіыс кӧдзӧма сё рӧма сьӧм.
Кыдз татчӧ веськалін, медмуса пуӧй,
войвывса видз вывъяс гажӧдысь льӧм?

Парк помас бокӧджык сувтін кӧть ӧтнад,
мичлуннад некодысь абу тай гӧль.
Сӧмын нин коръяскӧ казьтылан вӧтнад
му, кӧні овлӧма асланыд пӧль.

Сӧмын мӧй пуяслы сывъясьны колӧ?
Тӧда ме, воас жӧ медмича кад,
мулӧн быд пельӧсын йӧзлӧн тшӧтш олӧм
лоас, кыдз лунвывса дзордзалысь сад.