КЫВБУР, КОДІ ЧУЖИС БОЛЬНИЧАЫНБольничаын оз кыв серам, быд висьысьлӧн тан менам кодь жӧ мугыд сера кельдӧм чужӧмбан. Куйлӧ орчча койка вылын ёна жеб нин морт. — Менам, — висьтасьӧ, — зэв ылын тасянь чужан горт, но тай воліс жӧ на юӧр да эз вывті бур, шогысла пӧ гӧтыр юӧ самӧкур... Гижышт сылы месянь чолӧм, мед оз гажъяв дыр: коркӧ гортланьӧ кӧ вола, юкся сыкӧд пыр... Пошта кудйӧ, кыдз тан овсьӧ, нуис гижӧдтор. Мӧд асылӧ лэдзис ловсӧ орччӧн куйлысь морт... Кыдз-мый лои, эг и тӧдлы, — кыскис тувсов вой юкны шудтӧмлунсӧ мӧдлысь неыджыд кӧть войт. Уна мӧвпӧн юрӧй жуис, кытчӧдз выль эз варт: гашкӧ, мӧд мортӧс нин нуис рак либӧ инфаркт?.. Кор нӧ воас сэтшӧм кадыс, медсестра, бур чой, кор быд висьӧм сунас адӧ, коляс сӧмын баба радлун — кага чужтан дой?
