ЮХНИНЛӦН СЬӦЛӦМСійӧ сьӧкыда лолаліс, гудыртчис син: оліс медбӧръя часъяс Василий Юхнин... Ӧти керкаын овлім да, эз кодкӧ мӧд меысь бурджыка гижысьлысь нэм помсӧ тӧд! Сотіс морӧссӧ висьӧм, кыдз сотлывлӧ би, но эз торйӧдчыв удж дінысь вижӧдӧм ки. «Синмӧс куньла да аддза... — кос вом дорыс лӧз, — пашкыр пожӧмъяс шувгӧны... Яг вылас йӧз... Эм кӧ кытӧнкӧ ен, сылӧн сьӧлӧм кӧ сыв, — менсьым кевмысьӧм мыйла нӧ сійӧ оз кыв да оз сет лыда тӧлысьяс, ещӧ кӧть во гижны «Пожӧмъяс шувгӧны»... Дзик ӧти во!..» Енлы сійӧ эз эскы... Но вӧр-ва и му, Луза ю весьтӧ ӧшӧдчӧм аръясся ру, тувсов сынӧд и енэжлӧн лӧзалысь вон бура тӧдісны, дерт, муса пиныслысь дон. Луза берегын пожӧмъяс шувгӧны, и бара кылавны ю кузя тэрмасьӧ йи. Содтӧд ӧти лун му вылас гижысь эз ов, колис миянлы тшӧтш ассьыс сьӧлӧм да лов.
