ПЕЧОРА ЙЫЛЫН

Зверьяслӧн тан царство,
пӧткаяслӧн — рай,
налӧн государствоӧ
эн пыр корсьны пай.
Илыдз бердса нюрын
дозмӧръяслӧн койт,
йӧра нуӧ сюрас
кыалысь сӧдз войт.
Изъя кось оз сьӧмдыв
да оз ланьтлы чӧв,
пӧкнас зэвтчӧм сьӧмга
кыптылас, кыдз ньӧв.
Сувт да чӧла видзӧд,
кыдзи тӧвзьӧ кӧр.
Кӧин синмысь видзӧ
сійӧс пемыд вӧр.
Пармаыс кӧ тӧдса, —
шытӧг восьлав-уй.
Татчӧ дзикӧдз пӧдса
браконьерлы туй.