ЛАЯ ТЫ ДОРЫН

Лая ты дорысь джуджыда кыпӧдчӧм мусюр
вундіс кык пельӧ вискыслӧн паськалӧм вом,
бурӧвӧйлӧн кӧ вуджӧрыс ӧтарас уси,
сувтіс мӧдарас кӧръясӧс видзысьлӧн чом.
Татшӧм талунъя тундралӧн чужӧмыс-баныс,
кодӧс некор эз жалитлыв турӧб да зэр.
Вездеход тӧвзьӧ лунвывсянь аргышлы паныд,
дадьлысь сюв туйсӧ кресталӧ тракъяслӧн сер.
Мый нӧ, кӧр видзысь, мый тэнсьыд сьӧлӧмтӧ йирӧ,
шога, аддза ме, копыртін дзормыштӧм юр,
быттьӧ видзчысьтӧг уськӧдін Лая ты йирӧ
аслад койбедькӧд тшӧтш тасма чеп йывсьыд пурт?
Да ӧд казяла тӧждлунлысь помкасӧ тэнсьыд,
кӧть и абу, ме эскӧда, некутшӧм шог,
эз важ пӧльяслысь туйяссӧ жугӧдны-венны
джуджыд вышка бурильщикыс сувтӧдны лок!
Сійӧ петкӧдлас тэныд, кыдз озыра овны,
тэ жӧ отсав да велӧд, мед сылӧнсӧ ки
и лӧнь ты вылысь дзодзӧгӧс некор оз повзьӧд,
и мед дзордзалысь зын турун ковтӧг оз ви.
Сійӧс, тундрасӧ, ранитны кокниа позьӧ,
нӧшта кокниджык няйтӧсьтны медсӧстӧм ю,
но кор муслун морт сьӧлӧмын на дінӧ ловзяс,
сэк оз шогсьыны кут весиг сывлытӧм му.
Ӧзйӧ кӧр видзысь чом пытшкын бипурыс жара,
пӧртйын руалӧ пелядь и чайникыс пӧсь.
Татчӧс олысьӧс видлыны воласны бара
бурӧвӧйясысь оз ӧти зэв дона гӧсть!