***

Сыктывкар, аэропорт, Щербакову Ф. В.

Здравствуй, Эдуард!

Тэрмася вочавидзны тэнад письмӧ вылӧ. Письмӧтӧ вайисны тӧрыт рыт, самӧй вӧлі биалӧма да куйла гӧбӧч вылын — вися. Коймӧд лун нин мучитча кынӧм висьӧмӧн. Сӧмын талун неуна кокньӧдыштіс да лоис долыдджык.

Ассьым поэма эштӧді, но бӧрыннас эз кут аслым кажитчыны. Ковмас буракӧ переработайтны, ӧткымын ёрта сӧветъяс тӧд вылӧ босьтӧмӧн.

Водзӧ выльторъяс пока немтор на эг гижлы.

Деревняӧ мунігӧн кӧсйылі Юхнин ёртлы сетны «Ударникӧ» кык-куим кывбур — 12 №-а журналӧ, но буракӧ оз нин удайтчы. Надейтча, мый 1939 во лоас ёнджыка плодотворнӧй тайӧ несчастнӧй 1938 во дорысь, оз кӧ бара нинӧмтор торк.

Кутам, Эдуард, гижны, кыдз кутас гижсьыны, пуктыны ас водзӧ сэтшӧм могъяс, кодъяс могмӧны сьӧлӧмлы, но ньӧти ог кутӧ угодничайтны «Ударник» журнал редакторъяс водзын, кодъяс гашкӧ наивнӧя думайтӧны: вот пӧ ми веськӧдлам Коми сӧветскӧй литератураӧн да ми сайын став коми гижысьяслӧн став ӧнія и будущӧй судьба.

Деревняын прамӧя нин дӧзми. Дӧзми сэтшӧм пемӧс нога олӧмысь, кутшӧмӧс ӧні нуӧда сиктын. Гортысь петны некытчӧ дзик: кино ни радио, бур книга ни газет. Сӧмын сёя да узя. Медбӧрын ещӧ кутшӧмкӧ тӧдтӧм висьӧм уськӧдчыліс, куим лун бӧрын со бара кок вылын ветла. Кык вой да лун эг узь, а век ӧтарӧ быгляси да горзі. Лун вит-дас мысти навернӧ нопъяся да мӧдӧдча карӧ либӧ Объячевоӧ.

«Лит. газетатӧ», верман кӧ, ме вылӧ дзик забронируйт да мынты долгсӧ. Адрессӧ пока урчит: Объячево, Прилузский р-н, доручасток. Если кӧ лоас кутшӧмкӧ изменение адресын, сійӧс позьӧ бур вылас вежны. Ме локта карас не сёрӧнджык декабрь 15 лунысь.

Аддзысьлытӧдз!

1.XІІ.1938 во,

д. Сотчем, Палевицкӧй с/с, Сыктывдин. р-н.

Ананий Размыслов.