***
Сыктывкар, Пединститут, студенту Щербакову Фёдору Васильевичу.
Здравствуй, Эдуард!
Кыдз тӧдан, ме пышйи карысь. Ӧні наслаждайтча сиктса спокойствиеӧн да гортса посни челядь зык-шумӧн. Гортын видза кага да уджала поэма вылын. Темаыс — неуна обороннӧй, а главнӧйыс — неудачнӧй любовь. Заводиті гижны шӧрсяньыс. Сы бӧрын кӧсъя помавны да выльысь заводитны! Пока уджала гырысь темпъясӧн. Сӧмын талун гижи 165 строка. Татшӧм успешнӧя да кокниа некор на эг гижлы. Если кӧ и водзӧ кута гижны татшӧм темпӧн, лун кык мысти поэма лоас гӧтов. Поэмалысь началосӧ гижи нин Объячевоын, но кольӧма сэтчӧ, и ӧні ковмас гижны выльысь. Зэв забеднӧ, но немтор вӧчны, гашкӧ артмас бурджыка. Кутам надейтчыны. Уджалан настроениеыс эм. Сійӧ эськӧ вӧлі ёна ыджыдджык, если кӧ пыр эз мешайтчыны посни чой-вокъяс. Олам вой керкаын: комната пемыд и абу удобнӧй. Талун, поэмалысь самӧй лирическӧй моментсӧ гижигӧн, водзӧс кӧтӧдіс ичӧт чой! Настроение ёна чиніс да ковмис дугӧдчыны. Тайӧ письмӧсӧ гижигӧн, гашкӧ, кыптас бӧр, да вермас бара кыпӧдчыны Парнас гӧра вылӧ. Тӧрыт помалі Пушкинлысь «Братья-разбойники» коми вылӧ вуджӧдӧм. Эштӧді кык рытӧн да ӧти лунӧн. Кор бырас юрысь «идея», думайта кутчысьлыны «Руслан и Людмила» вылӧ. Сійӧ зэв ыджыд и сьӧкыдтор, но дыр да ёна уджалӧмӧн позьӧ вӧчны.
Фотографияӧн эг на эштыв занимайтчыны дай погоддяыс пыр эз вӧв лӧсьыд.
Сиктын вывті гажтӧм. Гортысь некытчӧ ог петавлы. Том нывъяс абуӧсь матігӧгӧрын, а ылӧ мунны забеднӧ. Каитча, мый век на абу гӧтыра, да прамӧя завидуйта тэ вылӧ да кора висьтавны поклон Александра Васильевналы!
Сэтшӧм мӧвпыс менам эм жӧ,—
Абу сьӧлӧм менам пу.
Кора тэнӧ: воигкежлӧ
Корсьны карысь гӧтырпу.
Ӧтчыд аддзылі ме коркӧ,
Вывті муса, вывті шань,
Мича ичӧт незнакомка
Сьӧлӧм ӧзтіс, шондібан!
Кора аддзӧдлыны сійӧс,
Сылӧн татшӧм серпас ног:
Еджыд кудри шляпа улын,
Синъяс пытшкын — быттьӧ шог.
Ветлӧ ӧтнас кино вылӧ,
Рам да жугыль чужӧм выв.
Аддзылан кӧ, висьтав сылы
Месянь пӧсь да мелі кыв.
Збыль и шутка!
Вот и ставыс! Пока!
Навернӧ, регыд дӧзма тані олӧмысь да кая карӧ, либӧ муна Объячевоӧ.
А. Размыслов.
17.XІ.1938 во, д. Сотчем, Палевицкӧй с/с, Сыктывдин. р-н.
А. Р.
