***

Сыктывкар, ул. Коммунистическая, дом Колхозника, Щербакову Ф. В.

Эдуард ёрт!

Ме лыддя, дерт, ачымӧс мыжаӧн тэ водзын сы вӧсна, мый та дыра эг вермы вочавидзны тэнад письмӧыд вылӧ, кодӧс пӧлучиті зэв нин важӧн.

Кыкысь кымын эськӧ заводитлі жӧ да, кыдзкӧ некыдз помавнысӧ эг вермыв, век кутшӧмкӧ притча талялӧ. Сэсся ветлӧдлі командировкаын да, мый да, сідзи и коли пӧраыс. А пӧраыс кыдзкӧ вывті ӧдйӧ кутіс кольны, ачым абу рад, ӧткымын причинаяс вӧсна.

Ошосдор системаысь петӧм йылысь ӧні некутшӧм сёрни нуӧдны ог вермы, сы вӧсна мый неважӧн пӧлучиті ӧтвет начальник Ковалёвсянь, коді чорыда гижӧма «Не разрешаю». Сэсся сідзжӧ ачым надейтча, мый положениеыс водзӧ вылӧ кутас бурмыны дай мен лоӧ кокниджык. Ошосдорсянь гижӧмаӧсь, кӧсйӧны обеспечитны миянӧс полнӧй штатӧн, мӧд ногӧн кӧ, сетасны нӧшта ӧти техникӧс да инженерӧс.

Воддза письмӧсӧ менсьым оз туй лыддьыны серьёзнӧйӧн сы вӧсна, мый сійӧс лоис гижӧма кутшӧмкӧ минутнӧй грустнӧй чувство подув вылын, коді, ме чайта, лоис тӧлькӧ куритчӧмысь дугдӧм переживайтӧм вӧсна. Дерт, вӧлі и збыль вылӧ неуна сэки, но сӧмын... неуна ичӧтик тор-частичка, кодӧс эськӧн позис сӧмын веритны.

Но сэсся, Эдуард, менам Сыктывкаръясӧ волӧмъяс регыд кадӧ оз предвидитчыны, а тэ вай коркӧ думыштлы да шваркнитлы жӧ Абъячойӧ пукасьны. Ме думайта, мый тэн сійӧс позьӧ вӧчлыны кутшӧмкӧ служебнӧй командировка подув вылын.

Выльторъяс тані вывті абуӧсь менлы вылӧ. Сӧмын неважӧн пӧлучиті 65 шайт — «Ударникысь» гонорар! Сійӧ вот выльтор, мый кутісны асьныс ыставны авторъяслы. Но не сьӧмын делӧыс.

Сэсся, тэ корлін фотокарточка. Ыстыны ог вермы абу вӧсна. Коркӧ снимайтча да вӧлись нин. Фотографияӧн ӧні ог занимайтчы: фиксажыс абу да нинӧмӧн закрепляйтчыныс.

Но сэсся будь здоров!

Ананий Размыслов.

Март 24 лун. Абъячой, 1938 во.

Дор. участок Ошосдор НКВД.

Эн дивит тэрмасьӧмысь.

А. Разм.