БАМ СТРӦИТЫСЬ КОМИ НЫВЛЫ

Валя Малыгиналы, геологлы.

Кыдз нин сэн, зэв ылас, олан,
чужан кыв шы кор он кыв,
Валя, тэ шуда геолог,
БАМ стрӧитысь коми ныв?
Некод тай мырдӧн эз ысты
ньылавны бипурса тшын,
аслад жӧ сьӧлӧмыд кыскис
сэтчӧ,
кӧн збыль колӧ вын
венны,
мый сьӧкыднас шуны
сьӧкыдлун тӧдысь оз пов...
Кокни туй вӧлі кӧть уна,
На лыдысь ӧти эз ков!
Сӧрысьлӧн овлӧ на, нылӧй,
том йӧзӧс увтыртан лёк...
Тэ пыдди висьтала сылы,
мед чӧвтас лӧсявтӧм шог!
Чужан му джынвыйӧ шуда
сійӧн,
мый сылӧн нин эм.
Том войтыр асланыс уджӧн
тэчасны мичаджык нэм.
Эм налӧн тырмымӧн ярлун,
вежӧр да уджалан сям.
Сувтасны уна выль каръяс
сэн,
кыті нюжалас БАМ.
Асыввыв саридз тшӧтш сьылас
томлунлы выль сьыланкыв,
кодӧс тэ медся водз кылан,
медводзын восьлалысь ныв!