КОМИ НЫВБАБА ЛУНВЫЛӦ МУНІС

Коми нывбаба ышмис
да лунвылӧ муніс,
ньӧбис сэтысь
кык ӧшиня неыджыд чом,
коді дзоридзьяс пӧвстӧ
дзик вевтӧдзыс суніс,
и эз дӧзмӧдлы некодӧс
вир юысь ном.
Вот и ов да пыр ов, эськӧ,
дзоридзьяс пӧвстад,
кӧні вой тӧвлысь лов шысӧ
некод оз кыв,
шоныд моресянь солӧн
да чериӧн ӧвтӧ,
пачысь гӧгыльтчӧм кӧвдум кодь
шондіыс сыв.
Сӧмын мыйлакӧ гажтӧмчис
нывбаба миян,
быттьӧ вужъясьны дзоридз моз
муас эз куж:
кутіс эндыны аньлӧн
зэв тэрыб киас
керкабердса пыр вичмысь
да помавтӧм удж...
Мый эз тырмы нӧ сылы?
Двореч, гашкӧ, ковмис,
гашкӧ, керкасьыс джуджыдджык
чукӧра сьӧм?
Вӧлі керка и сьӧм,
позис шогсьытӧг овны,
а вот некӧн эз тыдавны
пелысь да льӧм...
Орччӧн сыкӧд эз шувгыны
коз пу да пожӧм,
тувсов войлӧн эз петкӧдчыв
шензьӧдан мич.
Муыд паськыд,
но эм сылӧн лӧнь Эжва вожын
некор вунлытӧм бать-мамлӧн
муяс да видз...
Коми нывбаба лунвылын,
Олӧ, сэн олӧ,
дінас абу ни баля,
ни каньпи, ни пон.
Кокни вежӧрнад олігад
ышмӧмысь колӧ,
кыдзи аддзанныд, мынтыны
зэв ыджыд дон.