АРСЯ ВОЙ УСИНСКЫНГажтӧм серпасыс тундраса арлӧн, мудзӧ сы вылӧ видзӧдны син, но со чужӧ, кыдз кодзулӧсь лайнер, Колва ю дорӧ сувтӧм Усинск. Сэтшӧм кадӧ ме быдми да ола, кор оз вермы нин шензьӧдны мойд: выль гостиница няньӧн да солӧн со тай чуксалӧ колльӧдны вой. Ме кодь гӧстьыд тундра шӧрад уна, кодлӧн оз ёна пӧсявлы мыш, а бурмастер став вахтанас мунӧ йирны бурнас Полярнӧй тшӧтш кытш. Ӧти жырйын дзик ӧткодь квайт койка, дерт жӧ, дзескыд, но абу ӧд люкс! Война кадся да сы бӧрся войяс кодкӧд сӧмын ас нэмын эг юк. Но кор ныр горӧн мӧдӧдчис сьывны дзонь бригада, а эз ӧти морт, — вермис кӧрт тув и сійӧ тшӧтш сывны, а ӧд сьӧлӧмтӧ кӧртӧн он дор!.. Мыйла, арся вой, нюжалан кузя, ньӧти, тыдалӧ, ме абу жаль, чайтін, ланьті да, чӧскыда узя, кывза Штрауслысь зэв мелі вальс? Ог ӧд ёртъясӧс — ачымӧс ёра, мыйла синъясысь воштывла ун... Быд бурильщиклы Войпельлысь кора ыджыд шудлун да дзоньвидзалун. Найӧ петасны шлякалы паныд гудыр кыалӧн сувтӧмкӧд тшӧтш, пятилеткалӧн пуктыны планӧ кизьӧр зарниӧн медсьӧкыд кӧш.
