ПОЛЯРНӦЙ КЫТШ ДОРЫН

Муслуныд сы дінӧ кыдз нӧ оз йиджлы,
аддзан кор кок увсьыд раминик вижъюр:
тувсов лӧнь асылӧ медводдза дзоридз
воссьӧма шахтаӧ пыран туй дорын…

Тасянь Полярнӧй кытш абу нин ылын,
сьӧлӧмтӧ лов шыыс йизьӧдӧ сылӧн,
сынӧдын паръялӧ дыр еджыд бобув,
вижъюр оз корсь аслыс шонтысян кобув;
ӧттшӧтш шахтёръяскӧд асылын садьмӧ,
на вылӧ видзӧдӧ, нюмъялӧ, радлӧ,
здук кежлӧ синъяссӧ сӧмын и куньлас,
шонді Инта сайса нюрӧ кор сунлас.

Нэриник дзоридз, но збыльысь ӧд чудӧ
воссьӧма шахтаса неыджыд лудӧ!
Петасны лаваысь сьӧдасьӧм зонъяс,
некутшӧм зарниӧн найӧс он донъяв!

Налысь, геройяслысь, кодъяслӧн уджысь
шондіысь пӧсьджык на шонді жӧ чужӧ,
мичмӧдӧ туйнысӧ нэриник дзоридз
йирмӧгӧн пӧльтысь Полярнӧй кытш дорын.