КАНИН НЫРДЫН КАР

Быд карлӧн аслыссикас серпас
да ловъялӧн кодь ловъя лов,
а талӧн кыпӧдчӧм быд керка
оз прӧста сьӧлӧм пытшкад ов.
Веж пожӧм босьтіс сывъяс кытшӧн
Печора бердса Канин нырд,
а пелысь уличаяс кышис
да лоис кыа рӧмысь гырд.
Кор ылыс Изсянь тӧлыс петас,
быд пожӧм панас сьыланкыв,
а пелысь налы кисӧ сетас,
кыдз кадрилясьны сувтӧм ныв.
Эм уна ю лӧз енэж улад,
Печора кодьыд абу мӧд:
пӧсь шонді югӧръяснас гулыд
и кыпыд сьӧлӧмъяслы рӧд.
Кор Канин нырдсянь дзорган чӧла
да мӧвпнад, абу кӧ зэв ныж,
пыр кылан, кыдзи берег пӧлӧн
Русанов кывтӧ... Сылӧн пыж
дзор пожӧм улӧ бара сувтас,
а сійӧс чолӧмалас кар,
кӧн весиг кымӧрбердса увтас
выль войтыр сьӧлӧм биысь жар.