ЛЕНИН ЛЫДДЬӦ «ГӦРД ПЕЧОРА» ГАЗЕТ

Войвылын омлялӧ тӧвпомса турӧб,
пармаӧ пырас и сэні оз пӧд.
Зэв ылыс войтырлысь олӧмсӧ бура
некод оз аддзы да некод оз тӧд.

Тышыс гражданскӧйлӧн сӧмын на кусі,
белобандитъясӧс чергӧдіс пом.
Войвывса пияныс этша мӧй уси,
кодъяслӧн сьӧлӧмныс вӧлі зэв том!

Кыаыс садьмис да ӧтарӧ ойдіс:
шонділы туй сэсся коді оз сет?
Ленинлы киясӧ, збыль кыдзи мойдын,
вайисны сэк «Гӧрд Печора» газет.

Войвылын, сідзкӧ, выль кодзулыс чужис!
Мед сійӧ ичӧт, кыдз гӧрддзасьӧм кор,
олӧмсӧ Комилысь югдӧдны кужас,
тӧдмалас шуд сэтчӧс уджалысь морт.

Ленинлӧн тӧждлуныс тырмымӧн вӧлі:
ыджыд му гӧль, ёна киссьӧма, тшыг...
Сійӧ эз аддзыв Печора ю пӧлӧн
йи пленысь мездмӧ кыдз тулысся гы.

Нюмъёвтіс кыпыда...
— Аттьӧ, бур ёртъяс!..
Сьӧлӧмыс зэв ыджыд радлунӧн тыр.
Комиысь козинсӧ дыр видзис ордас,
кутлӧны кыдз медся донатор пыр.