МЕДВОДДЗА ЭЗЫСЬ ШАЙТ ЙЫЛЫСЬ БАЛЛАДА

Владимир Ильич оліс медбӧръя лунъяс,
эз бура нин кыв, гашкӧ, висьӧмлысь дой,
то дыр кежлӧ вошлывліс дженьыдик унмыс,
то нинӧм, мый вайлісны, сійӧ эз сёй.

Став му шарса мырсьысьяс кывзісны чӧла,
кыдз тіпиктіс Ленинлӧн сьӧлӧмас вир,
ӧд зэв вылӧдз кыпӧдӧм чарла да мӧлӧт
важ олӧмлысь кырисны сьӧд гудыр йир.

А сылӧн эз тырмы нин чеччывны выныс
да шуны на ёртъяслы кымынкӧ кыв,
мед выль государствоысь тшыналысь тшынӧн
и грӧш мында озырлун некор эз кывт.

Лёк вӧрӧг моз тшыглун кӧ вочасӧн чездіс,
и гӧльлунлы сэтшӧм жӧ веськалас пай...
Ой, кыдз эськӧ сыысьсӧ медӧдйӧ мездас
оз кодкӧ, а эзысьӧн дзирдалысь шайт!

Чеканитны босьтчисны сійӧс да ӧдйӧ,
мед аддзылас ачыс Владимир Ильич,
кыдз медводдза шайт вылас выль шонді ӧзъяс
да быдӧнлы петкӧдлас олӧмлысь мич.

...Ме зэв бура помнита шогалан лунсӧ,
пӧсь синва эз йизьӧдлы кӧдзыдыс кор,
а медмуса мортыслысь палявтӧм унсӧ
эз пальӧд став мырсьысьяс бӧрдӧмлӧн гор.

И медводдза эзысь шайт кута со киын
да сывъяла му, коді некор оз берд,
а кувлытӧм Ленинлӧн нем повтӧм пиян
и космосӧ лэптісны миянлысь Герб.