* * *

Кузь туйӧ петавла шоча,
эновтны жаль шоныд поз...
Поездъяс тӧвзьӧны воча,
мӧдарлань — кажитчӧ — оз.
Век жӧ, пыр окота мунны,
ньӧбны плацкартнӧй билет,
синлыскӧс топӧдны унлы
поездлӧн шы кӧть оз сет.
Висьтав вай тэ кӧть, бур нылӧй,
аддзан ӧд, кутшӧм ме дзор,
колис да ёна-ӧ ылӧ
Збой Томлун станция кор?
Сэтчӧ и коліс тай петны
эз кодкӧ мӧдлы, а мем.
Сӧмын бӧр косны оз сетлыв
важмӧм билетъясӧ нэм...
Тэрыба котӧртӧ поезд,
сьӧлӧмыс сылӧн оз мудз.
Мыйла нӧ кодзулӧсь войыс
ме моз жӧ ӧні оз узь?